爆谷一周︱谷德昭同張家輝「復出」再拍喜劇？！節目唱尹光《Dear Myself》

爆谷一周︱《爆裂點》張家輝被梁洛施摑咗4、5巴

《爆谷一周》講到醫院一場戲張家輝要被梁洛施摑一巴，張家輝分享當時話拍就拍，事前又無講借位乜都無，跟住就開機，然後梁洛施一巴打埋去，張家輝即時耳嗚，然後張家輝仲搞笑表示被打完都無人理佢，只係同梁洛施講應該要點做先更好，張家輝就笑指聽到呢句即係要再打啦，但都係無話人佢知要唔要借位，然後嗰場被打咗4至5巴，然後當時臉部已經被打到麻痺咗。

爆谷一周︱張家輝笑到喊大爆當年拍《綫人》打到黑仔「唔得」

張家輝講起自己被打，就話諗起當年拍《綫人》時的趣事，仲話佢一唔開心就會諗起單嘢！當時劇情講到學校戲桂綸鎂同謝霆鋒逃命，姜皓文黑仔追捕佢哋，然後桂綸鎂有個場口係拎起袋黃金打黑仔，張家輝講返起，當時話「試一個先」，然後桂綸鎂就隨即拎起袋黃金打落度黑仔，黑仔被打後又唔好意思出聲，但係大家都見到佢好痛，錢嘉樂就同桂綸鎂講「小鎂，試位架咋」，然後再嚟多個試位，點知跟住桂綸鎂再一嘢打落，大家都關心黑仔有無事，張家輝笑言通常大家都會死頂話無事，但黑仔真係頂唔順表示「有事」。張家輝同谷導講呢件事，大家都笑到標晒眼水！

爆谷一周︱谷德昭大爆同張家輝一直度緊套喜劇！

谷德昭問到陳偉霆最深刻係張家輝的咩電影時，陳偉霆就指一定係化骨龍，然後谷德昭問到張家輝會唔會再拍喜劇，就大爆原來2人一直都構思緊一套喜劇，只係拍喜劇要同社會、時代好密切，而個世界變得太快，如果突然脫節咗就唔係嗰回事咁，唯有再繼續度落去。

事後谷德昭IG講返拍喜劇一事，表示張家輝真係仲有好興趣做喜劇，強調張家輝份真係好好笑，係一個開心底嘅人，只係而今做喜歡太有風險，大家入戲院都只係會對一啲較嚴肅的主題有興趣，再加上「上批評文化泛濫，觀眾好多都紥起晒個弶入場搵嘢彈」，指而家引人笑真係好難，不過佢哋都唔會放棄「總相信會諗到啱時勢啱口味嘅喜劇，到時，讓此起彼落嘅笑聲掌聲滿載戲院，那對創作人來說是最大的滿足感」

爆谷一周︱張家輝聽尹光聽到眼濕濕仲介紹埋俾張學友

谷德昭問到張家輝如果要佢揀康城最佳導演定係最佳演員，張家輝表示話遇到鍾意的事就應該盡情去做。後來佢聯想起最近好喜歡尹光的〈Dear Myself〉，表示聽咗好多次，聽到眼濕濕，覺得好有共嗚，好切合自己的心情，仲即場感性唱咗2句，未進軍Hollywood但過足口癮，佢指佢仲幻想自己隔離屋如果有個尹光的叔叔真係幾好。

後來仲話將呢首歌介紹咗俾張學友聽，但張學友就無聽到眼濕濕，張家輝笑指因為張學友比較冷血。張家輝仲提到尹光早前疑抽林明禎水一事，佢話尹光回應當日佢太太在場，張家輝表示幾好，夠真實，谷德昭都表示呢啲對白真係度都度唔到。