吳家樂還擊樂易玲「忘本論」提森美小儀過檔話中有火
吳家樂還擊樂易玲「忘本論」
YouTube節目《娛樂好好玩》的主持人吳家樂和梁思浩對樂易玲的「唔好忘本」評論表達了看法，吳家樂直言：「首先，炎明熹有冇違反合約精神吖？合約期間履行晒佢責任，合約完咗，老實講，人望高處，你又唔知呢間公司畀咩Offer佢，如果當初諗住要捧佢或者長遠發展，你係咪應該晨早要傾呢？點會畀佢繼續拖，拖到埋尾喇先傾唔掂呢？係佢自己幕後工作人員嘅責任囉。」
梁思浩直指炎明熹值更好條件
吳家樂在節目中講到非常勞氣：「你個條件如果符合到佢要求，一個妹妹仔講真而家去到呢個位，梗係想去遠啲，玩遊戲唔係要獎金就獎品，你offer好人哋咪留低囉，唔係忘唔忘本！」梁思浩表示同意，並認為覺得炎明熹值得更好條件：「講真，炎明熹係值得畀好啲條件佢，好多歌星前輩都讚佢係少有嘅高潛質，唔應該用一般妹妹仔待遇囉！」
提森美小儀過檔話中有火
吳家樂之後又用森美小儀作例子，指二人均為有線出身，但在未過冷河的情況下就入TVB，句句都超帶火：「你（森美）入TVB之前，都做過好多電台同電影公司啦，就用森美做例子，佢之前同阮小儀喺有線做，連過冷河都唔使就入TVB，唔通同TVB傾同約嗰陣，鬧佢忘本唔應該離開有線咩？呢啲叫合約精神，唔好講廢話啦，我預咗畀人插！」
狠批TVB雙重標準：幾多藝員黯然離開？
吳家樂最後狠批TVB雙重標准，指炎明熹有利用價值就要對方「不要忘本」，但一班陪伴TVB共度艱難時間的普通藝員最後就連合約洽商的機會都冇：「當初（TVB）話市道唔好，要共度時艱又無言感激咁，我諗好多藝人都知我講緊乜，喂，我哋唔係有共度時艱咩？到最後尾有幾多個係默默被放走咗、連合約唔同人傾，要轉行揸的士，嗰陣又見你話冇忘本TVB繼續養你？唔好覺得佢（炎明熹）值錢有利用價值就咁講，你諗吓過往有幾多位（藝人）係黯然離開呢間公司呀？」
炎明熹回應樂易玲「忘本論」
香港小天后炎明熹最近的動向成為眾人關注焦點，有傳她決定不再與TVB續約後，公司似乎有意將她「雪藏」，甚至連頒獎禮都未讓她參加。炎明熹近日親筆寫信試圖釋疑，但仍未能完全澄清離巢的謎團。在最新的公開活動中，炎明熹終於對TVB高層樂易玲的「忘本」指控作出回應，她表示合約依然在商討階段，工作亦由公司安排，不過畢竟合約細節比較私人，所以希望大家能夠多多支持，並表示對一切都抱著順其自然、隨遇而安的態度。
