內地女Fans：佢係渣男！黃子恆認與粉絲曾發生性行為
撰文：東方新地｜圖片來源：東方新地、微博、劇集劇照｜編輯：異種火星人 （原文刊於東方新地）
黃子恆𡁻完鬆 懷胎四個月內地女粉絲爆渣男惡行
黃子恆獲力捧演奸角
黃子恆係近年大台上位小生之一，先後於兩大重頭劇《降魔的》(2017)和《飛虎之潛行極戰》(2018) 飾演奸角，演技備受讚賞，加上本來外形不俗，令佢多了不少粉絲！
《是咁的》演律師獲讚
上星期大結局的台慶劇《是咁的，法官閣下》，收視一般但觀眾評價甚佳，大結局一集更被視為近年少有佳作！劇中黃子恆飾演律師賴澤明表現不俗，與後輩麥明詩的感情線十分討好，成為受歡迎的一對熒幕情侶！
內地女粉絲爆料
不過今日有報道指，一位名為Michelle的28歲內地女子，自稱係黃子恆的忠實粉絲，透露去年4月在廣州粉絲聚會中，首次與偶像見面，之後二人一直透過微博聯絡。Michelle稱一星期後有禮物送畀黃子恆，所以相約於深圳一酒店式住宅會面。
送禮物兼發生關係
Michelle向傳媒爆料時表示，當時佢認為黃子恆係一個公眾人物，唔覺得對方係壞人，所以放心前去。最後兩人先後洗澡後，在床上發生關係。不過在發生關係後，黃子恆半年來都未有同佢見面，只係間中閒聊幾句，亦未提及二人關係。
回復朋友關係 再發生性行為
報道稱，Michelle與偶像發生關係後卻被冷待，傷心得足不出戶、茶飯不思，後來事件在粉絲群組爆出，黃子恆為平息事件，承認雙方是好朋友，不過中間發生了誤會。Michelle聲稱今年1月時二人回復朋友關係，7月又再相約在深圳見面，並發生了第二次性行為！
粉絲鬧爆「渣男」揚言要黃子恆失業
發生第二次性行為後，黃子恆再次玩失蹤，但Michelle不久後卻發現自己懷有身孕，但男方至今都未再有任何回覆。Michelle直斥黃子恆係一個「渣男」，誓要搞大件事，揚言要男方連工都無埋！Michelle表示手握對方做錯事而哭訴的語音檔案及留言，又稱將會選擇墮胎。
曾聲淚俱下道歉
Michelle又大爆黃子恆的語音檔，原來兩人玩facetime時，黃子恆曾以普通話及廣東話喊晒口道歉，內容大致上係講對唔住、好抱歉做出傷害對方之事，佢唔知道點面對，唔知道點樣去彌補。
黃子恆認曾發生關係：做足安全措施！
事件曝光後，男主角黃子恆接受傳媒訪問時，承認的確曾與Michelle發生性行為，但就只有一次，而且有做足安全措施，不介意去驗DNA以證明自己的清白。黃子恆又謂控制唔到對方做啲咩，只希望謠言唔好再散布。
2016年被指介入裕美婚姻
其實黃子恆都唔係第一次出現負面新聞㗎啦，2016年時佢被指介入裕美與老公林恩浩的婚姻，兩人被拍到一齊到街市買餸，期間男方更主動攬實女方腰！親密關係不言而喻。兩人買完餸後就返到男方位於西貢的村屋，兩人夾手夾腳準備晚飯，猶如新婚夫妻般甜蜜，最後裕美更留低過夜！
裕美：一班人開大食會
當時裕美個講法係當日係假期，所以一大班人開大食會，同行亦有其他幕後人員。一行人大約在八、九點離開，佢並沒有留低過夜。裕美又話自己正拍攝劇集，雖然同劇沒有黃子恆，不過自己好多嘢唔識，要向對方請教。最後佢話唔會理其他人點講，正如有人話佢整容一樣，佢唔會去理。
裕美驚爆離婚
之後被問到老公會否介意，裕美就驚爆已經搞緊離婚！佢話自己已單身半年以上，現在辦離婚手續，不過就唔回答是否出現第三者，只係話兩人性格出現問題，曾經試過挽救呢段婚姻，但最終都係解決不了。裕美話剛剛簽咗新經理人，會拍劇重新出發。
曾力媾女神Ali不果
黃子恆早年曾力媾當時上位中的李佳芯(Ali)，出動靚車接載對方到西貢撐枱腳食燭光晚餐，雖然最後齊齊返男方寓所，但據知Ali當時嫌對方仍是七線奀星，所以緋聞無疾而終。其後，Ali專心拍劇，更憑《潮流教主》人氣急升，現已為大台一線花旦！
Ali現時與男友陳炳銓關係穩定，打風都打唔甩！
吳若希落閘
黃子恆又曾被拍到與吳若希去赤柱食飯而傳緋聞，不過事後吳若希即落閘說：「朋友食飯，冇咩特別，我哋識咗好多年，佢好似哥哥咁。」黃子恆見未能得手，亦惟有認命只表示跟對方係朋友。
