楊思琦講老公前後矛盾被質疑講大話 網友：根本連個仔的生父是誰都唔知
廣告
楊思琦早在12年遇上空心老倌吳帥而未婚懷孕，及後就誕下大女穎穎(楊卓穎)，楊思琦亦母兼父職獨力撫養女兒；直至去年，楊思琦竟突然又再懷孕，她表示細兒子Kody的爸爸是圈外人，二人在去年（2019年）時就在美國註冊結婚。日前，楊思琦接受媒體訪問，期間被問到有關隱形老公身份，楊思琦繼續避談，但一時就表老公唔使幫手湊仔，另一邊又話大女穎穎用whatsapp與後父溝通，有網民睇唔過眼，圍插楊思琦根本無老公，還叫她唔好再講大話。
撰文：東方新地｜圖片：楊思琦IG、楊思琦微博｜編輯：八卦妹（原文刊於：東方新地）
楊思琦扮搵到幸福
42歲的楊思琦當年遇人不淑，錯愛吳帥誕下女兒穎穎，她咬實牙關帶住囡囡由美返港，努力搵錢養家，去年再懷上第二胎，經手人身份不明，她卻對外扮幸福話自己與一位圈外人已婚，老公姓乜名乜隻字不提，由懷孕產檢到入院生仔，老公都冇出現過，最詭異的是阿仔都係跟阿媽姓。
楊思琦出新歌做宣傳
楊思琦產後繼續頻撲工作搵錢，阿媽就幫手湊仔女，去年轉型做歌手的楊思琦，早前新歌《仲夏陽光》面世要做宣傳，她接受訪問時，就被追問隱形老公究竟是何方神聖，任由楊思琦怎樣有備而來，答案始終有漏洞，甚至完全解釋不到，不過楊思琦繼續遊花園自圓其說。
楊思琦強調尊重老公
楊思琦被追問老公為何要這樣神秘唔見得人，她笑指老公是圏外人，所以唔會習慣這種模式，想他以舒服為主。記者指楊思琦能夠將丈夫的消息做到滴水不漏，保密功夫相當耍家，特意向楊思琦請教當中秘訣，她想了一想話無特別，都是順其自然，而且想尊重老公，所以就無話刻意想去公開，更提到無得晒恩愛亦不會感到難受。
楊思琦嬲豬拒絕再講
楊思琦口中的老公一直隱形到底，辛苦生仔無老公陪，生完繼續做家庭經濟支柱，對於老公有無幫過手湊仔，楊思琦就話佢自己唔需要幫手湊，結完婚，仔都生埋，個老公可以對頭家毫無貢獻，真係好爆！
講到大女穎穎點同後父相處，楊思琦竟然話個女會同後父用whatsapp傾偈，記者再問多一問，叫楊思琦分享一吓老公對佢做過最感動的事，佢即拉閘拒絕再討論。崩口人忌崩口碗，楊思琦畀人問到口啞啞根本無得再兜，網民即時插爆大鬧，話佢係大話精，質疑楊思琦老公從來無確實存在過，甚至猜測佢根本連個仔的生父是誰都唔知。
