苗僑偉《使徒行者3》硬攝搶視帝 大熱人選林峯、王浩信都要讓路
撰文：東方新地 ｜ 圖：東方新地｜ 編輯：K.P（原文刊於：東方新地）
林峯、王浩信今年視帝大熱人選
「 53周年台慶」曲終人散，下一個無綫全台藝人的重要大日子，肯定是一年一度的「萬千星輝頒獎典禮」，當中視帝視后兩個大獎，更是一眾小生花旦的最高榮耀，今年的「萬千星輝頒獎典禮」，已定下年一月舉行，辛苦一年等攞這張成績表的小生花旦們更是不容有失，為攞獎各出奇謀，努力催谷人氣作最後衝刺。食盡天時地利的兩部台慶重頭劇《使徒行者3 》及《踩過界2 》，相對便比早階段播出的劇集佔優，「爆 Seed 」林峯和「盲俠」王浩信更被喻為是今年視帝大熱人選。
林峯湊女大過天 獎項唔夠吸引力
離巢五年的林峯，離巢作《使徒行者》更是14年無綫全年最高收視劇集，去年無綫成功傾掂林峯回巢助陣再演「爆 Seed 」，的確為《使徒3 》成功造勢，不過去年底宣布同內地女模張馨月結婚的林峯，今年九月女兒出世升呢人父，便一直未有再在港露面，當大家為林峯緊張，他今年能否在台慶頒獎禮陪跑十六次打破宿命開齋封視帝，原來林峯早看淡獎項，更忙於在內地湊女未有返港為《使徒3 》宣傳。據知情者透露：「結婚生女之後，阿峯心態已經唔同咗，話晒喺呢行都成廿年，搏命衝爭獎嘅日子已經過晒，依家對阿峯嚟講，冇嘢緊要得過陪老婆同湊女，始終個女出世都係兩個幾月，呢段時間老婆都係啱啱坐完月，阿峯要照顧老婆之餘，亦好緊張個女，每日睇住個女每一步成長變化，阿峯已經甜入心，依家佢根本唔捨得離開個女半步，喺內地拍電影時間容易遷就佢先會接，雖然無綫好想阿峯返嚟撐頒獎禮，但遇上疫情，中港來回要隔離廿八日，佢有好多嘢要顧慮，佢都同公司講明未必可以返到嚟，雖然係咁，無綫高層唔放棄，依家仲努力游說佢！」
苗僑偉入行四十年想錦上添花
林峯歎慢板，相反同屬《使徒3 》孭重飛的三哥（苗僑偉）永不言休，近年劇接劇冇停手的他，身為前輩對視帝獎項亦虎視眈眈，更希望在入行四十年能為事業錦上添花！近日《使徒3 》熱播，仍在趕拍邵氏網劇《飛虎之壯志英雄》的三哥，還努力分身配合宣傳博到盡。據知情者透露：「三哥同樂小姐本身就好friend，近年邵氏幾部大製作網劇，三哥都係台柱，佢真係好勤力，入行四十年對拍劇仲有團火，每次宣傳亦做到足，有時 TVB打嚟要佢幫手撐場，佢亦冇托手踭，喺《使徒3 》入面，三哥同林峯戲份叮噹馬頭，佢兩個嘅角色貫連整套劇嘅主線，林峯湊女宣傳完全冇影，三哥就做領軍帶住一班後輩出嚟宣傳！呢排劇集熱播口碑好，令三哥對攞獎亦信心大增！」
高層愛將王浩信棄宣傳賺人仔
而另一無綫高層愛將王浩信，今年先後在劇集《反黑路人甲》及《踩過界2 》演出都備受好評，近日劇集推出，更得無綫厚愛安排他返內地拍電影《兵王之絕境》擔正男一賺人仔，御准唔使留港宣傳，王浩信日前接受內地傳媒訪問，開腔承認恨再攞視帝獎，他直言今年自己有兩部大劇播出，辛苦後當然希望有回報，不管是攞劇集獎還是攞個人獎項都是一種鼓勵。不過17年已經憑《踩過界》盲俠一角封視帝的他，能否再以同一角色封帝似乎亦有難度，加上三哥硬攝搶獎，同前輩玩爭凳仔，唔通真係敢唔讓路咩？
