李佳芯解凍復出即搬屋築愛巢攜男友從柴灣屋邨搬入西貢住千萬獨立屋！｜頭號粉絲

李佳芯（Ali）自去年因網上言論，慘遭無綫雪藏，之不過早前李佳芯與拍拖六年的藝員男友陳炳銓，齊齊由柴灣屋邨搬入西貢，還入住超好風水的千萬獨立屋，帶份參與的劇集《殺手》就由倉底從見天日，並獲理想收視，李佳芯更自資出散文集《心之所在》，愛情事業再次得意。

撰文、圖片：東方新地｜編輯：八卦妹（原文刊於：東方新地）

李佳芯獲男友做心靈密友

李佳芯（Ali）簽無綫八年來機會不絕，坐穩一線花旦的Ali去年卻因網上言論而令事業受挫，據知情者透露：「Ali從來都係有嗰句講嗰句嘅人，就係咁輸蝕囉！經過呢次教訓，以後都會慎言。喺呢段時間，Ali依然冇停低，繼續增值自己，佢男友Danny（陳炳銓）亦非常支持畀好多鼓勵佢，同佢分析形勢同以後嘅路應該點行，拍拖六年嚟佢哋都好著重心靈溝通，真係打風都打唔甩。」

李佳芯與陳炳銓拍拖六年，過去一年二人事業同受挫，李佳芯被無綫雪，陳炳銓就不獲ViuTV續約，被封落難鴛鴦。

這日下午李佳芯與男友陳炳銓在西貢市的海鮮酒家醫肚，而愛犬豆豉就被獨留在車廂內，不過大家唔使擔心，有開窗畀足夠空氣佢呼吸，二人快速食完返上車。

進駐西貢白沙灣獨立屋坐正風水龍脈

Ali與陳炳銓被封美女與野獸的結合，由於二人效力敵對的電視台，拍拖初期已傳出無綫施予壓力，但事實證明Ali對男友矢志不渝，更排除萬難發展至同居，早年本刊影到他們在西貢夾錢租住村屋，之後再搬去將軍澳清水灣半島，到近月Ali與陳炳銓已進駐西貢白沙灣的獨立屋，愈住愈富貴，切合Ali視后身份。知情者透露：「Ali同Danny三年前養咗隻唐狗豆豉，搬上樓之後，佢哋覺得放狗好唔方便，再加上Ali事業有阻滯，所以就搵咗依家住嗰間西貢獨立屋，Ali雖然被放入雪櫃一段時間，但佢搵錢能力唔弱，今年四月ViuTV冇再同Danny續約，但佢依然繼續有劇拍同做幕後，都仲有好多Job，出面又開班教演戲，唔係坐食山崩！聽講佢哋依家住嗰度風水好好，入住冇耐Ali已經收到《殺手》會上，公司仲幫佢安排咗好多宣傳工作，就算唔可以拍合拍劇，香港市場都夠佢發圍！」

李佳芯與陳炳銓視豆豉如親生女，去到草地不停拋樹枝及拋波撩狗玩，又幫愛犬影靚相，不亦樂乎。

唔知係條Leggings太緊太貼身，抑或係身體唔舒服，玩狗途中Ali竟眾目睽睽下出手𢱑下體，女神儀態盡失。

本刊記者搵來著名玄學家吳佩孚，對於Ali位於西貢的新居，吳師傅表示原來該處有個傳奇：「嗰度有間車公廟，以前賴布衣去過，仲點咗個穴叫『虎下明塘』，附近山形好似五隻老虎向下，咁啱盤地就係呢個屋苑所在，照山形地勢嚟睇，嗰度人傑地靈，旺人緣、旺丁同埋旺事業，做藝人就會有觀眾緣，姻緣會好，亦催旺生兒育女。再睇屋前景觀，門前開揚遠景望山，西貢附近山脈壯大，搵錢容易，所以西貢亦特別多藝人鍾意住。」

Ali與男友的新愛巢位於西貢白沙灣，03年落成已有十七年樓齡，屋苑共有34個單位，每幢獨立屋有三層，實用面積1,234呎，屬低密度屋苑。

李佳芯孖男友貼地拍拖放狗

既然計劃趕不上變化，37歲的Ali順著前路走，與陳炳銓築起愛巢養狗為樂，近幾年Ali都喜歡去西貢市拍拖兼放狗，早前被迫停工，本刊記者亦影到Ali與陳炳銓貼地放狗，視后經常素顏幫襯茶餐廳同西貢海鮮酒家，繼續做回真我。做藝人一命、二運、三風水，事實證明Ali甚有觀眾緣，希望新居真的為她帶來好運，過完冷河繼續發光發熱。