《愛回家》細龍生鄭世豪發帖文「say goodbye」疑有離巢意思網友：唔好走呀！

鄭世豪憑《愛回家之開心速遞》中飾演「細龍生」一角而為人熟悉，但早前因「細龍太」陳偉琪被暫別離開《愛回家》劇組後，日前鄭世豪無先兆地在個人社交網上載多張含淚慘樣，仲留言與其苟且偷生，不如灑脫離開，一句「goodbye forever」，令不少劇迷都大感愕然，並以為他要離巢無綫與《愛回家》道別。

撰文：東方新地｜圖片：鄭世豪IG/fb、《愛回家》電視截圖｜編輯：HM（原文刊於：東方新地）

細龍生公開道別

細龍生鄭世豪日前在社交網po文講再見，張相仲係含淚慘樣，引來外界揣測他將要離巢。

細龍太陳偉琪早前被安排淡出《愛回家》後，細龍生鄭世豪又寫到咁，仲話goodbye forever，真係好敏感。

《愛回家》早前宣佈衝破1300集，舉行記者會時飾演細龍生的鄭世豪亦有現身，不過日前他在社交網上載了多張慘情劇照，留言寫到自己要離開，永遠再見，但未有交代離開甚麼？究竟是離開《愛回家》，定離開無綫，大批網民與粉絲留言追問，並力撐叫他不要離開，不過鄭世豪未有作出回應，惹來更多的揣測。

細龍生親自解畫

為了解真相，本刊記者致電細龍生鄭世豪，他才恍然大悟說：「真係好對唔住，原來令大家有咁大個誤會！我仲係喺無綫，只係細龍生因為劇情關係失勢被燉冬菇，要離開風光多年嘅生活。我個角色係會繼續發展落去，不過會落難，我都想靜待細龍太返來，不過真係未有任何消息。」一場美麗的誤會，令一眾細龍生鐵粉虛驚一場，鄭世豪趁機多謝大家對他的愛戴，叫大家唔使擔心！

《愛回家之開心速遞》連日來交代大龍生（羅樂林飾）終於在女兒龍力蓮（林淑敏飾）的協助下，成功逼退雷公（白彪飾），重奪接龍集團主席一位，不過身為雷公女婿的細龍生就落難。

細龍生親自解釋唔係離開公司，亦唔係離開《愛回家》，只是離開風光的生活，角色變得好頹廢。

大龍生一直把失勢之事歸咎於細龍生龍力士（鄭世豪飾）出賣他，所以調他到餐飲部，不過大龍生將總監一職交予送水輝（許家傑飾）負責，細龍生要做他下屬。

細龍生氣難平，加上突然面對很多自己唔識的文書工作，怒火更難消，不時走到男廁狂踢垃圾桶洩忿，搞到負責清潔的群姐向人事部投訴，令細龍生慘收警告信。

細龍生出歌紀念細龍太

細龍生鄭世豪在無綫打滾多年，2013年憑《星夢傳奇》奪得亞軍令事業更上一層樓，之後加入《愛回家》做細龍生，雖然經常被老婆雷珍妮(陳偉琪飾演)鬧係「廢柴老公」，但這對CP成功彈出。早前有傳陳偉琪被公司放逐冇得留低，細龍太被草草交代去了外國。這時鄭世豪剛加盟新唱片公司天盟娛樂，更寫了一首新歌〈只准你話我是傻〉送給細龍太，MV更由合作三年的細龍太陳偉琪擔任女主角，《愛回家》暫時冇得合體，粉絲睇住MV頂癮先啦！