強國5大山寨節目《極限挑戰》99% match
抄到5年前 好嘢
由東方衛視製作嘅《極限挑戰》由黃渤、孫紅雷、黃磊、王迅、羅志祥、男團EXO成員張藝興作固定主持，每集都有唔同嘅考驗，而喺闖關時，會收到唔同嘅指令同提示。就好似喺７月時播出嘅第4集，主要係話6位主持通過匿名電話接到任務，要佢哋喺限定時間內，喺圖書館搵出示紙條再拆除炸彈，間期製作為加強效果而引爆車輛。內容、拍攝角度以及情節同MBC黃金綜藝節目《無限挑戰》2011年時所播出嘅「SPEED特輯2」一模一樣。跟到咁足，以為佢有版權，sor，一樣係冇，因為中國版已經被央視買入，預計10月底播出。不過，即使係山寨，又即使連MBC都出聲話過份，但《極》依舊播映當中。
播完即抄
曾擁有KBS《兩天一夜》版權嘅四川衛視，第1季搵嚟吳宗憲、韓星安七炫等人主持，喺約滿之後，成功吸收當中嘅精髓，隨即打造出《明星家族的2天1夜》，並搵嚟李菲兒、周韋彤、卜學亮，以及韓星安宰賢等人做主持。節目主要係喺中國境內進行2日1夜嘅旅遊(藉此推動當地旅遊業)，過程中加插不同嘅遊戲挑戰。對於被指侵權，製作人就話過：「韓國嘅綜藝節目唔似歐美咁有所謂嘅版權，只係有製作授權，韓版叫《HAPPY SUNDAY》，四川衛視引進時翻譯成《兩天一夜》，並且喺國家商標局進行咗註冊，只不過當時冇公示。」
星級歐遊 咁啱啫
由湖南衛視製作嘅《花兒與少年》，主要係由2位少年，喺有限嘅旅費之下，帶住5位姐姐去歐遊，由租酒店、租車到伙食安排都要靠自己。節目整個形式，同韓國tvN嘅《花樣姐姐》一！模！一！樣！以為佢有版權？Sorry，係冇嘅。冇咩回應？都係冇囉。
至於有同tvN買入版權嘅東方衛視，節目當然可以叫《花樣姐姐》啦，旅遊地點就選擇咗土耳其同意大行，並搵嚟林志玲、徐帆、王琳、奚美娟、宋茜擔任姐姐，而馬天宇同李治廷就做導遊。
死性不改？10個IPHONE 6S跪求改進PK位
假想情侶 一街都係
由湖北衛視同韓國CJ集團一齊打造嘅《如果愛》，搵嚟6對中、港、韓、台嘅明星通過節目相知相戀，並且去到世界各地體驗真正戀人生活，節目已經發展到第2季，2PM燦盛、李光洙等人都有份玩。雖然內容構思同韓國MBC嘅《我們結婚了》真係好似，不過真正嘅版權其實係由江蘇衛視所擁有，而喺今年播映時，節目名改為《我們相愛吧》，並搵嚟SJ成員崔始源、林心如等人做假想情侶。
自創等同抄襲?
江蘇衛視聲稱自創嘅《明星到我家》搵嚟張栢芝、黃聖依等女星，「嫁」到去雲南農村（連拜堂呢個環節都要做埋），成為農村媳婦，落田、餵豬、洗衫、煮飯等一腳踢之餘，當然要服侍埋奶奶啦。雖然話係自創，但唔知點解玩法同韓國JTBC嘅《偉大的嫁人》一模一樣?
內容延讀：
[…] >強國5大山寨節目《極限挑戰》99% MATCH […]