張敬軒「抱怨」靚聲慘變「全損音質」！粉絲上載360P《Chill Club》壓縮到黐脷根

撰文：Andy丨圖片：張敬軒IG丨編輯：海月

靚聲被壓縮到黐脷筋 張敬軒出post「抱怨」

張敬軒最近頻頻上節目獻唱，唔少粉絲都再次被佢嘅靚聲征服。有個粉絲就將佢喺《chill club》演唱嘅《黃色大門》upload到YouTube。不過呢位粉絲Upload條片居然係360P，軒仔睇到段片都忍唔住喺IG出post「抱怨」啊。

張敬軒嘅演唱片段被壓縮至到「全損音質」，最慘嘅係軒仔把靚聲居然被壓縮到變「黐脷筋」！聽上去仲有少少譚仔阿姨嘅口吻。

軒仔就喺IG轉發該片並感嘆：「你話人生究竟有幾無常？」

佢仲搞笑留言：「正當全世界都喺度玩緊高清影像、無損音質嘅時候。我親愛嘅歌迷大姑幫我po上youtube，竟然係360p、全損音質兼黐脷筋嘅ChillClub，以下讀『燒咳』。」

軒仔仲搞笑地扮片中腔講：「喎茂撚過喎大呀次嗨ViuVeeVee嘅燒咳就梗讓茂左。」（「我冇諗過我第一次喺ViuTV嘅《ChillClub》就咁樣冇咗。」）

佢又Hashtag「巧地地個口琴intro變_咗嗩吶」、「JoeyTangSir我對你哋唔字」、「條脷硬過我條命」，繼續爆笑向上傳影片的「經手人」投訴！

張敬軒親自演繹「黐脷筋版」《黃色大門》

經過一晚發酵，呢個post變道人氣十足。作為十分寵溺粉絲嘅軒仔喺IGStory親身演繹「黐脷筋版」《黃色大門》，令一眾粉絲覺得十分搞笑！

網民紛紛留言稱：「全損嘅音質就好似Dun爛咗嘅布甸」、「呢個version要上冠軍歌」、「聲音經過特別處理」、「笑到標眼水！」等。