小薯茄明星運動會9月舉行！公開招募義工引災難？網民：貼錢都制

小薯茄搵義工引發關公災難？

小薯茄成員阿冰、童童、麗英、程人富等幕前演員，紛紛幫忙轉載及宣傳，小薯茄公開明星運動會的timeline，公開3月時開始籌備，現階段則是招募工作人員、籌集資金及搵贊助以及邀請嘉賓等，7、8月進行地獄式訓練，9月比賽，11月有片睇！而現階段最重要是公開招募義務性質工作人員，負責當日計時、計分、帶領進場、禮儀小姐等，只要填表格就得㗎喇！網民反應非常激烈，不過同時引發公關災難！

網民：最低工資都畀唔起？

有不少網民不滿小薯茄搵義工，有搵人笨之嫌，「叫觀眾做義工會唔會唔係咁好，伙食車費都要錢，仲要做成日」、「最低工資都畀唔起？無budget就唔好搞啦，邊個咁度縮諗出嚟㗎？」、「又唔係慈善點解要人做義工？」、「錢就你袋汗就人出」、「咁樣明呃人好肉酸囉」、「小薯茄終於發生關公災難」。

網民：奧運都請義工啦！又冇人迫你參加！

同時有不少網民力撐小薯茄，幫忙反擊，「人哋target係fans，唔會計較咁多，又無人迫你參加」、「如果咁介意，咁粉絲見面會都要收車馬費啦」、「台灣有超過二百萬的channel木曜4超玩都搞咗個運動會，都係請義工，希望小薯茄都成功」、「好似電視台搵現場觀眾咁啫，唔通又要畀人工佢哋？」、「有得近距離見阿冰，我貼錢都做」、「阿冰童童叫到，實幫拖」、「我請假都去做呀」、「可以近距離見阿冰童童就係人工啦」、「大佬呀，奧運都請義工啦」、「渣馬斟水嗰啲都係義工」。

小薯茄對被評批義工要倒貼，即逐一回覆，指義務工作人員會有車馬費、當日膳食及紀念品，並在招募宣傳上補充這一項，相信小薯茄首次舉辦大型活動，只是未有刻意注明，不是要義務工作人員倒貼車馬費及膳食。