【尋人記】龜兔組合的婚姻之道！從$14,000「門柄」悟出相愛40年的秘訣

【尋人記】今集尋找一對多年前曾參加婚姻輔導營（夫婦營）的夫婦，探討婚姻相處的真諦！因為老婆性格幹練急躁，相反老公則比較慢，於是形成了一對「龜兔組合」。老公經常要完成老婆嘅各種要求，產生相處問題，多年後不但無離婚仲愈來愈恩愛，原因係因為一個$14,000門柄！？

撰文：Mila｜圖片來源：TVB《尋人記》截圖｜資料來源：TVB《尋人記》｜編輯：海月｜原文刊於：新假期

《尋人記》第8集：龜兔夫妻的婚姻之道！
夫妻性格一快一慢，相處壓力大

Frankie和Sabrina夫婦，因為兩人性格各異，老婆Sabrina處事說做就做，比較心急；老公Frankie則比較慢，因此造成婚姻相處問題。丈夫坦言覺得老婆要求很多，生活大小事都被老婆催促，追得好辛苦。於是兩人參加了婚姻輔導營（夫婦營），學習夫妻相處之道。

當年二人要裝修新居，老婆好喜愛一個價值$14,000的門柄，老公雖然都好喜愛呢個門柄，但係實在太貴，所以唔捨得買。

以前Frankie實會發脾氣叫Sabrina唔好買，但係今次佢無咁做，只係默默行埋一邊交俾老婆決定。可能人就係有反叛心理，越唔俾買就越要買，但當Sabrina自己靜落嚟反而更加理智，諗清楚既然唔係必要，於是放棄咗無買呢個門柄。

雖然買唔成門柄，但係就悟出夫妻相處的真諦就係互相尊重同遷就！

拍攝隊透過婚姻輔導師重新搵到Frankie同Sabrina接受採訪，兩人現在都年過70，並已經榮升爺爺嫲嫲。雖然婚姻上曾出現相處問題，但佢哋不單無離婚，從片段中更發現佢哋感情更勝從前！到底佢哋有咩相處之道，令到佢哋可以成功相愛到白頭？

兩夫妻都坦言對方有很多缺點，但慶幸嘅係兩人嘅想法都好正面，從來都唔會諗離婚，更加唔會提「離婚」兩個字，如果遇到問題就解決。Sabrina話佢哋將呢條界線守得好緊，因為如果你成日諗離婚、提離婚，你會被自己洗腦，有一日你就真係會咁做。

人到晚年，問到兩人想會希望哪一位先離開，Frankie就表示希望自己先離開，因為留低嗰個好辛苦。Sabrina則笑言老公很自私，最好就一齊走。諗到有一日要同老伴分開，Sabrina講講下都忍唔住流下眼淚。字裏行間都感受到兩人感情深厚。

子女亦受父母的婚姻觀念影響，就算遇到咩問題都唔會輕易提離婚。

當兩位主角分享他們的愛情故事時，網民卻放錯重點，指他們身住的豪宅更吸引、間屋超大，同樣令人羡慕！

相扶相愛到老不容易，希望Frankie同Sabrina嘅婚姻相處之道可以為大家帶來一啲正面嘅影響。大團圓結局雖然老土，但卻係每一個人都最想見到嘅結局。

撰文：Mila｜圖片來源：TVB《尋人記》截圖｜資料來源：TVB《尋人記》

關鍵詞