宅女任你鬧Ashly Chan

今期嘅主角YouTuber Ashly Chan，上年開始活躍於YouTube頻道，雖然同其他YouTubers比，佢頻道嘅訂閱人數唔算多，但論是非同爭議性就一啲都唔低，只因佢以超性感cosplay打扮拍打機片，靠性感出位。觀眾對此反應十分兩極，有巴打對佢「派糖」照單全收，但更多人鬧爆佢，不過大情大性嘅佢就話唔在乎。「其實有人睇我已經覺得係種支持，我本身係宅女，行性感只因有實際需要，哈哈哈……」Ashly笑得豪情，其實撇開魔鬼身材，佢的而且確似男仔多啲。

text – Jessie photo – Hin

「性感唔代表淫蕩。」

有34C嬌人身材嘅Ashly，平時行慣性感，但同本刊做訪問影相反而着得密實，最多露條腿俾大家睇，佢話：「打機片着得性感係因為cosplay個角色真係咁，平時我會因應番天氣着衫，而家天氣重係涼涼哋吖嘛！就會着多少少。」

做落訪問就會知佢真實個性同佢片中一樣，大癲大肺、敢做敢言，佢啲打機片可以見到佢反應極誇張，玩手電遊戲《Puzzle & Dragons》抽到正斗角色會激動大叫。Ashly話自己由細到大都好粗魯，有一排都想自己斯文啲，但都係改唔到，佢媽媽重話佢係「大聲婆」。

天生豪爽，所以佢唔在乎網上嘅haters攻擊佢以露肉博like！「我覺得佢哋唔應該咁老土囉！而家重有好多人覺得女仔着得性感少少就係淫娃蕩婦。喂！你哋要知好多動漫角色嘅設定都係咁性感，所以我一係唔玩cosplay，一玩就好難避免。同埋啲人一睇到條片嘅標題同預覽就留言鬧咗先，其實睇慣我啲片嘅人會知道，通常撳入去睇片前張預覽圖已經係最性感，片中係冇更大膽嘅嘢睇，佢哋鬧咪由得佢哋囉，我又冇做錯。」

「肯睇已經係支持。」

去到某個程度，Ashly重話被網友鬧係種鼓勵。「一直覺得肯睇我已經係種支持，在意我先會留言，係好事，所以佢哋話我好又好，唔好都好，我都冇乜所謂。當然，如果係叫我改進嘅留言，我會檢討下，但如果一嚟就問候我娘親講粗口，咁梗係自動過濾啦！」

至於點解要cosplay住打機拍片，Ashly話係因為好想成為佢哋。「我成日諗，如果我係動漫角色幾好，通常佢哋內外都好完美。又或者無論個角色係好大小姐或性格好差，都一樣有人會鍾意佢哋，所以好想成為佢哋。不過要我去動漫展嗰啲公開場合cosplay我又未夠膽，咪惟有拍片時玩住先囉！」

被欺凌領悟人性

Ashly性格爽朗，原來同佢細個曾經被同學蝦有關。「我細個係肥妹仔，升上中學時曾被同學欺凌，試過無啦啦被人唧啲檸檬茶落校服。當時我160cm高，但重140磅。我覺得我嘅人生唔應該係咁，點解要被人蝦？所以升中三嗰個暑假好努力咁減，食好少嘢，又日日跑籃球場，成功減至110磅。好記得開學第1日，我聽到有兩個同班男同學喺後面討論緊我係邊個，1個話：『唔係喎！佢冇咁瘦。』另1個就話：『好似真係佢喎！你試下嗌佢！』佢哋真係叫我，我擰轉頭問佢哋做咩？瘦咗之後，就冇人再欺凌我，呢個世界就係咁現實，人性就係咁膚淺，只睇外表。我都唔係好明點解要蝦啲肥嘅人。可能有過呢段經歷，反而令我更覺得做人唔需要理人點睇。」

Ashly偶爾都會上載呢種超性感片段，呢條係佢1次拍攝嘅幕後花絮片。

http://www.youtube.com/watch?v=k4AW6CKpEtY

Ashly曾經喺高登開post，叫大家留言想佢做啲咩，佢會照做再拍埋片。大情大性嘅佢就算喺鏡頭前撩鼻屎都唔介意。

上高登被針對

上網打Ashly Chan個名，頭2、3個搜尋結果就會彈出「香港網絡大典」有關佢嘅profile，原來佢2007年開始係高登絲打，當時佢用咗鍾意嘅漫畫角色名Mr. Love嚟做網名。不過個a/c已經被人ban咗，原因係佢post自己嘅YouTube link上去，被人投訴有商業成分。「其實有人叫我用假身分幫自己post link，但我覺得係自己嘅嘢，應該要自己承擔番責任，所以我一直冇否認個a/c係我。

「但之後我只係開post講嘢都被話有宣傳成分。前前後後被ban咗5、6次，我覺得好唔公道，擺到明玩針對！有好多巴打絲打知道之後都願意借a/c俾我用，不過而家都只係睇，唔會打嘢，費事累到人哋個a/c。今年年初有次宴會，我遇到高登CEO林祖舜，我同佢講呢件事，佢當時承諾會同同事講，開番我個a/c，但目前都未開番，哈哈。」

由於好多網民都只係憑Ashly嘅行為同埋外表而評定佢為人，佢就曾經專登拍條片澄清番大家對佢嘅誤解。

出名打得屎

不過Ashly會開始拍片，都係沿於高登。「大約喺2011年頭，嗰時高登好流行讀潮文，但通常都得聲冇樣，我就貪得意拍咗條有埋我個樣嘅。第2日瞓醒，見到有十幾廿萬人睇過，都有啲嚇親，之後就開始試下拍片。中間有段時間荒廢咗差唔多成年，因為每日都掛住打機。跟住慢慢發現有人會拍打機片，我就諗不如自己都試下打機順便拍埋片啦！」

由上年3月開始，Ashly出片出得好密，當中唔止有打機片，咩類型都有，講日常生活大小事、分享購物打扮心得、針對社會熱話發表意見等等，佢而家係全職YouTuber。「我打機唔係勁，反而出名打得屎，毫無技術可言。網上有咁多打機高手分享，我就諗人哋點解要睇我呢？咁所以就開始扮埋入面啲角色，吸引多啲人嚟睇。有啲網民都知我打得好水皮，但久而久之佢哋反而肉緊為我打氣，想我有進步，所以經常會睇到佢哋好忟憎，好似恨鐵不成鋼咁，於是我就拍下其他嘢，唔想大家覺得我係專業gamer，我純粹係鍾意玩。」

Ashly最先係拍片讀潮文，第1條係講高登仔對女仔啲相有好多批評意見，由於同佢身分好貼近，到而家都重有人會以為嗰啲潮文係佢個人意見。