姜濤叱咤演出被狠批網民力勸跟偶像羅志祥學嘢：淨係學人個名叫Show

2023年1月1日的《叱咤樂壇流行榜頒獎典禮2022》上，由姜濤演唱的《鏡中鏡》獲得專業推介叱咤十大「第四位」，一眾姜糖都勁興奮。不過姜濤在表演環節，表現被指「勁炒車」，引來一眾網民甚至是鏡粉的怒轟。

網民力勸姜濤跟偶像羅志祥學嘢：「淨係學人個名叫Show」

於1月1日的《叱咤樂壇流行榜頒獎典禮2022》，姜濤榮獲專業推介叱咤十大「第四位」，然後現場表演《鏡中鏡》，由一開始姜B就進入狀態，大叫一聲「Let’s go!」然後跪低唱歌。之後更是興奮地衝落台表現，在表演中不斷怒叫，被封上「咆哮系歌手」的稱號。

姜濤叱咤演出有讚有彈

不過有唔少觀眾睇完姜濤的演出，認為今次姜濤的表演相當失準，並認為在休息期間姜濤沒有好好為表現準備，才會出現其狀況。不過都有Fans力撐，認為姜濤的表演完美地表現出歌曲的情緒，直指「當晚現場睇其實好有氣氛好有火！希望大家比多啲鼓勵，讓說話留在善良的溫度裏」、「多謝姜濤，當晚演出好好」、「今次真係好好體現到鏡中鏡的意義」。

網民嘆：姜濤唔該學下你偶像

有讚當然有彈，唔少網民都於連登開post，直言姜濤今次表演「炒車」，有人更是忍唔住開post以「姜濤唔該學下你偶像」為題去評擊他，在內文中po出一條羅志祥於今年花蓮太平洋觀光節跨年演唱會的片段，並指羅志祥在落住大雨的情況下仍可以「連續唱跳30分鐘唔喘氣唔揸流攤」，表演十分專業。

姜濤淨係抄到羅志祥叫Show！？

相比起姜濤的偶像羅志祥，網民直言姜濤只是「淨係學人個名叫show，髮型打扮就抄到十足」，又轟其「實力、精神就一樣都學唔到，好唔好意思」。唔少網民都認同該說法言之有理，並認可羅志祥的能力「羅志祥每次都好認真對待表演，佢可以洗底咁快，某程度真係努力+實力換返黎」，亦有網民認為43歲的羅志祥無論在體力活力上都勝於23歲的姜濤。