大離婚日︳林日曦幫前夫唱衰鏡仔無懼「鏡安法」Tiger現身現場！

林日曦的年度無聊企劃舞台劇《大離婚日》正在火熱公演中，先後上映由田蕊妮主演的獨腳喜劇《大離婚日 —— 妻》、林日曦的舞台映畫戲《大離婚日 —— 夫》。兩套舞台劇好評不斷，重演再重演，去到昨日（3日）林日曦的《大離婚日 —— 夫》（3/6）舉行第12場演出時，一眾藝人鄧麗欣、何韻詩、周國賢就連MIRROR成員Tiger邱傲然都嚟埋支持，令全場歡呼，事關大膽的林日曦喺舞台劇中不斷「唱衰」Tiger，林日曦都趁機喺謝幕就大爆返「Tiger事件」的來龍去脈！

大離婚日︳林日曦幫前夫「唱衰」Tiger

林日曦的《大離婚日 —— 夫》內容多次講到MIRROR同埋成員Tiger，林日曦就趁Tiger喺現場時，就講返佢創作的心路歷程，佢指：「「大半年前，我開始寫《大離婚日》夫妻呢個戲時，我就覺得點都要幫幫班前夫唱衰嗰班鏡仔，我覺得嗰個女主角一定要鍾意MIRROR入面嘅其中一個。咁我係男人嚟，我係完全唔熟MIRROR，我差唔多唔識分佢哋12個人，所以我開始上網搵佢哋啲訪問片段嚟睇，我真係睇咗好多，我諗住搵其中一個成員寫入去，就喺呢個時候，我留意到喺每一條MIRROR訪問片段入面，硬係喺個角落頭會有一個長髮男人，佢默默揸住一堆咪，遞畀企後面嘅姜濤。咁你哋知啦，姜濤都好多嘢講㗎嘛⋯⋯我意思係，記者要佢答好多問題，OK？所以佢講好耐。如果我係負責遞咪嗰個人，我一定心諗：『頂你講完未？好L攰呀隻手！』」全場爆笑，佢繼續講：「但呢個長頭髮嘅男人，冇唔耐煩，佢收得好埋，我嗰時喺度諗：『呢種人，唔多說話，默默做事⋯⋯似我！』收收埋埋嘅人，一爆就會不得之了，所以我揀咗佢寫入劇本，好多謝Tiger唔介意畀我唱衰。咁佢都冇得介意啦，因為記者問到，佢哋身為偶像，係只能夠答唔介意㗎咋。」

大離婚日林日曦的《大離婚日 —— 夫》大膽要「唱衰」mirror！ — 林日曦的《大離婚日 —— 夫》大膽要「唱衰」mirror！（圖片來源：《大離婚日 —— 夫》劇照）

大離婚日︳林日曦無懼「鏡安法」隔空合照！

林日曦大爆完「Tiger事件」的來龍去脈後，佢表示其實有同事問佢要唔要cut咗戲中「唱衰Tiger」的部分，林日曦就坦言指自己唔驚「鏡安法」：「「其實臨公映之前，都仲有同事叫我，不如Cut咗嗰段佢啦，驚你犯鏡安法喎。挑我心諗，我駛驚？」後來監製得知Tiger會嚟，就入場前邀請Tiger上台同林日曦隔空合照，以示和好，並獲得Tiger一口答應！Tiger隨即上台大方地與「林日曦紙板」同埋佢本人隔空視像合照。雖然唔驚「鏡安法」，但林日曦仍搞笑地請Tiger「叫你啲小虎隊冷靜啲」，最後仲寄語佢：「希望你第時攞到最受歡迎男歌手時，記得飲水思源，多謝返我，約定你！」

大離婚日林日曦大爆完「Tiger事件」的來龍去脈後，Tiger上台同林日曦隔空合照 — 林日曦大爆完「Tiger事件」的來龍去脈後，Tiger上台同林日曦隔空合照（圖片來源：《大離婚日 —— 夫》劇照）

大離婚日 Tiger喺ig仲讚返林日曦「創新感動」 — Tiger喺ig仲讚返林日曦「創新感動」（圖片來源：ig＠tiger_yny）

大離婚日︳林日曦「無論去到邊度都好，我都一樣係香港人」

林日曦喺謝幕時仲發表唔少搞笑又感人的謝詞，例如林日曦指出有同事問佢係咪因為去到札幌發現觀眾席無人，所以先用盡劇院每個角落去拍片，佢認真地解釋：「我話唔係，原因係無論去到邊度都好，我都一樣係香港人嚟，我畀咗錢，我係一定要用到盡嘅！」惹得全場捧腹大笑。

大離婚日︳林日曦：呢個充滿欺騙的時代感謝「癲喪仔」無條件信任

林日曦特別多謝一班自稱「癲喪仔」的觀眾：「我當你哋呢班『癲喪仔』係最癲嗰班『癲喪仔』，因為以前我做Talk Show、舞台劇或者獨腳戲，你哋都喺乜都唔知嘅情況下買飛，我當你哋係一時『Short咗』，但今次我都講到明，呢個係我自己到呢一刻都形容唔到係咩嚟嘅實驗，你哋都一早去買飛，我諗大概有7000個人⋯⋯呢7000個人，一係你哋就好相信我，一係你哋就『Short 得好勻循』，我相信係後者。」他最後希望能跟大家永遠停留在「一買一賣的肉體關係」上，千萬不要對他抱有太大期待。