周星馳拍《少林女足》公開招募5大條件靚女 勁多明星留言報名

少林女足︳周星馳列5大條件公開招募開拍《少林女足》

周星馳22日於自己61歲生日，喺IG曬出寫上「2023-0622」嘅《少林女足》劇本，仲留言列出5大條件公開招募靚女：「今天我只有一個願望，就是能與 一大群不同國籍、年青貌美、身材標緻、天資聰敏、體能出眾的靚女，一起共渡難忘時光，人數不拘，多啲嚟密啲手，我無懼人山人海，只怕妳未夠風彩！」最後仲話嚴禁P圖：「P圖造假絕不會得逞，我們團隊不會答應！國際社會更不會答應！」

人妻女星爭住留言 Coffee、胡杏兒都報名

雖然周星馳講明要「年輕貌美」嘅靚女，但唔少人妻女星都無視星爺要求，紛紛留言報名，其中包括胡杏兒、陳敏之、林熙蕾、Coffee、孫慧雪等。Coffee仲留言話連擔擔抬抬嘅角色都照殺：「除咗年輕貌美，有無d搬搬抬抬嘅角色？我體能岩駛喎星爺」

唔少男明星都有留言想參與！連Edison都有留言「CAN I BE ONE OF THE GIRLS ??」

年輕貌美女歌手踩過界 連TVB奀星都報名

除咗一班人妻女星雀躍留言之外，雲浩影、J.arie、顏卓靈等幾位女歌手都踩過界報名應招，雲浩影仲留言指：「本人骨格精奇，跪求一個打雜嘅機會！」關嘉敏同莊思明等TVB女藝人都有報名。為咗得到星爺青睞，關嘉敏更不顧形象，留言直指自己有香港腳：「生日快樂，星爺！岩哂。少林女足，我有香港足！」

日本代表有「佢」！

今次星爺講明要「不同國籍」，日本女優浜崎真緒都有留言報名：「日本代表。我準備好了」。網民都即刻留言支持：「我最期待的人物出現了」、「如果你有演這部電影的話我一定去看」等。