口罩小姐喺大帽山玩仙女棒呃like 網民：想做第二個張潤衡？

主角為疑似口罩小姐 20 強「秋香」

事件嘅主角係1979年度香港小姐季軍鍾慧冰（冰姐）嘅女「莉莉菇」林靜莉(Jeannie)，自從上年參加咗 ViuTV 真人騷節目《阿女又戀嚟》之後人氣開始急升，平時 ig 仲會 post 唔同靚相，估唔到今次呃like呃出禍！有眼利嘅網民更發現就係就《尾二一屆口罩小姐》20強入面嘅「秋香」！

大帽山玩仙女棒呃like 網民問係咪犯法

Jeannie最新一張相就係喺影住自己拎住發光物體，內容寫住：「第一次玩仙女棒 嚇死我」，更tag咗地點喺大帽山，有網民就喺討論區問究竟咁做係咪犯法，引起好多人討論！更有網民轉貼香港嘅《危險品條例》第六條「非法藏有煙花爆竹，最高可罰款2萬5千元及監禁6個月。」

根據香港法例第295章《危險品條例》，煙花爆竹屬香港禁運及受管制物品，除獲發認可牌照，任何人不得製造、貯存、運送或使用任何危險品，或由任何受僱人、代理人或貨倉擁有人管有、保管或控制任何違禁品；非法藏有煙花爆竹，最高可罰款2萬5千元及監禁6個月。

而漁農署亦有關於山火嘅條例，根據《林區及郊區條例》（香港法例第96章）及《郊野公園及特別地區規例》(香港法例第208A章)「在郊野地區，郊遊人士應在指定地點生火，隨意生火，可被檢控，違者可被檢控罰款可高達25 000元及監禁1年」。唔知係咪因為有網民指出咁做有機會犯咗法，Jeannie嘅ig已經即刻將最新嘅相delete咗喇！

網民熱烈討論：想做第二個張潤衡？

Jeannie嘅post一出，網民嘅反應都幾兩極，一邊幫Jeannie維護：「香港真係好多正義魔人」、「唔明有咩問題」、「咁你報咗警未？」，另一邊就大鬧咁做好不負責任：「救一次山火要用好多人力物力，又害到消防員同野生動物條命」，更有網民重提八仙嶺張潤衡事件，啜核咁話：「點都好過上山食卡碧嘅」，但亦有網民指出萬一喺山上面玩仙女棒生火，搞到出現八仙嶺事件2.0就唔好啦，仲有可能會變成第二個張潤衡，到時冇咗個靚樣仲點選口罩小姐啊！