劉松仁疑中風撐拐杖 好友米雪陪做保健操強身
撰文：東方新地 ｜ 圖：東方新地｜ 編輯：K.P（原文刊於：東方新地）
劉松仁疑中風撐拐杖
入行四十九年的劉松仁，拍過不下數十部受歡迎劇集，15年在無綫拍完最後一個劇《華麗轉身》，松哥便轉攻內地，去年更為舞台劇《利瑪竇》擔任創作及導演，由綵排到公演都落力監場，事事親力親為。不過自去年四月完成舞台劇後，去年底傳出他中風消息，指他身體欠佳行動不便，甚至說話不清。日前，與他相識超過四十年的好友米雪，專登駕車到他位於何文田的寓所送上健康食品慰問，松哥撐著拐杖與米雪企街吹水精神奕奕，期間米雪更即席示範教松哥做伸展運動，對老友健康狀況非常上心，原來米雪連月來一有時間便會陪松哥練氣功、行山及約三五知己陪松哥飲茶，以行動鼓勵松哥加油！有好友支持送暖，是松哥最佳治療良藥，希望松哥早日康復，回勇再現熒幕同觀眾見面。
太太陪做物理治療
今年一月《利瑪竇》公演 Part2，松哥終於現身，雖然身體狀態已不如前，全程要撐拐杖慢行，上落亦要人在旁攙扶，不過身體比以前消瘦的他，看落精神不錯，之後松哥又被傳媒拍到由太太陪同到健康中心做物理治療，對於身體出狀況，松哥只表示是不小心跌傷。雖然身體出問題，不過松哥一直正面面對病情，聽從醫生指示好積極做治療及運動鍛鍊。據知情者透露：「自從出事之後，松哥右腳同右手都冇乜力，要撐拐杖先行到，朋友介紹咗幾個專科聖手畀佢，一路跟進佢嘅情況，醫生都同松哥講，治療過程可能會較漫長，康復進度亦好視乎佢意志同努力，最緊要係有信心勤力做運動唔好偷懶，松哥好積極，堅持每日都做運動，又會專登由屋企行大段路落旺角，雖然行得慢，但松哥唔怕辛苦好有正能量，所以情況進展得唔錯！」
米雪約埋練氣功
同松哥相識超過四十年的米雪，本身和松哥非常老友，得知松哥身體抱恙，米雪不單緊張介紹中西醫給松哥接受治療，又不時陪松哥做氣功、行山鍛鍊體魄。據知情者透露：「米雪同松哥識咗幾十年，咁多年來一路keep住聯絡，近年佢哋為咗強身，仲會約埋一齊練氣功，幾年前松哥認識一位內地高人，相信觸感治療，佢都有介紹米雪去試，知道松哥依家要多啲做運動治療，米雪就鼓勵松哥去行山，行山除咗可以有一定運動量，喺山裡行亦令人心曠神怡特別舒服，行完個人都醒神啲。怕松哥會悶，米雪仲不時約埋以前一班老友出嚟陪松哥飲茶飯敍，喺呢個時候，有朋友開解同鼓勵，對松哥嚟講會特別有能量，心情愉快做咩都會順啲！」
與友人傾足一小時
日前，米雪專登駕車載同一名女友人，到松哥位於何文田的寓所探他兼送健康食品。當日身穿深灰色外套，戴口罩、太陽眼鏡現身的松哥，將手機用吊繩掛在頸，一個人撐著拐杖步出寓所，索性同米雪企在寓所外傾偈聊天，雖然撐住拐杖，松哥看來非常精神說話亦好有中氣，三人說到興起，期間松哥又攞手機分享相片給米雪看，米雪又教松哥做伸展運動，松哥跟著好友指示伸展左手，傾了近一小時，米雪同松哥話別，自己駕車離開，松哥則撐住拐杖慢行返住所。翌日早上約十時許，松哥好勤力又一個人出動鍛鍊，今次則在寓所樓下的停車場做保健操，因為疫情關係，松哥近期較少外出，現時每日會在停車場散步及做保健操強身，只見他將手向前伸展之後又往後伸，如是者做了幾十下，由於右腳彎曲能力不太好，見他亦微彎雙腳之後企起身，藉運動鍛鍊腳力，做了大半小時才行返上樓。充滿正能量的松哥，相信復原指日可待。
紅足四十年與米雪為熒幕情侶
71年考入麗的藝員訓練班入行的劉松仁，可謂紅足幾十年，76年演《陸小鳳》聲名大噪，大俠造型風流倜儻，三年間演出五套《陸小鳳》系列，之後的《京華春夢》敦厚懦弱書生角色亦大受歡迎，即使步入中年，劉松仁在無綫繼續劇接劇，《大時代》、《婚前昏後》、《男人之苦》、《名媛望族》，以致07年中港合拍劇《歲月風雲》都擔正，拍盡不少當紅花旦。
71歲劉松仁與65歲米雪相識超過四十年，兩人自76年合拍第一套劇 《陸小鳳與西門吹雪》 ，便經常合作 扮演情侶，之後合作的 《萍蹤俠影錄》 、 《啼笑姻 緣》 ，二人成為觀眾眼中的金童玉女，松哥 15年幫TVB拍最後一套劇 《華麗轉身》 ，米雪亦有客串演出。
