似毒非毒 薑檸樂：我要做填詞人！
佢就係呢期香港其中1個最紅嘅YouTuber薑檸樂（真名蕭慶峰），佢憑呢個廣告由網絡躍上電視，亦坦言好開心。「啲親戚朋友喺街見到有我個樣嘅廣告，就會影相send俾我父母，佢哋開心我就開心。」
但靠「毒」搵食嘅佢，就話自己只屬「微毒」級數。「毒男鍾意打機、睇漫畫，我全部好少做，只係少少內斂囉！」佢話平時最愛聽歌、改歌詞，夢想係成為填詞人。
text – Jessie photo – Pakco
上年薑檸樂幫Balancy「清肝。明目飲」拍攝廣告，令佢被更多人認識。拍攝現場好多人，但因為係喺泰國，工作人員主要係講泰文，所以佢唔驚，重覺得輕鬆，唔使自己度橋，跟住演就可以。
薑檸樂之前曾拍攝熱爆可愛韓文歌〈Gwiyomi〉放上網，當時佢都有以長髮示人。
鼻大唔開心
同薑檸樂做訪問，筆者發覺佢唔止「少少內斂」，講嘢係一句起兩句止，同佢喺網片入面口水多過浪花嘅形象好唔同。「我份人好慢熟，同我熟咗就知我唔係咁靜，係1個會成日諗啲古靈精怪搞笑嘢嘅人。但我天生怕醜，讀小學時，連舉手去廁所都唔敢。就算而家有時作公開表演或做主持時，上場前都會震一輪。以前做訪問只識答係同唔係，而家都會講到2、3句嘢，進步咗啦。」
薑檸樂係多產YouTuber，除咗有自己channel，重經常同其他YouTubers jam嘢。佢喺12年10月同另1位YouTuber凍豆腐合作，2人一齊作曲填詞兼合唱佢哋嘅原創歌〈是是但但隨隨便便求求其其〉，一出街極受歡迎，目前點擊率超過69萬。薑嘅粉絲自此穩步上升，不過人紅自然多仇家，佢亦開始收到唔少負面批評。「好多時我都自動過濾啲惡性留言，唔會好上心，但話我鼻大、個鼻核突我有少少介意，因為我自己都覺得佢哋講得啱嗰度弊！以前成日被網民批評我有懶音，我都有出過條片嚟笑自己。其實我之後都冇刻意練咬字，但近來再冇人提呢樣嘢，可能佢哋習慣咗。」
佢同凍豆腐合力創作嘅〈是是但但〉真係幾洗腦，曲風重有少少香港獨立1人樂隊the pancakes嘅影子添。
自製CD賣$5
唔少網民對YouTubers喺佢哋嘅片內插入收錢置入式廣告反感，薑檸樂都唔例外。「網上有人話我拍咁多廣告，剩係掛住搵錢，忘記咗初衷。佢哋根本唔知我初衷係咩，我一直都係想填詞，我冇唔記得，而且重堅持緊。」
2011年7月，薑檸樂首次放片上YouTube，但內容並唔係佢而家嘅自拍搞笑片，而係佢改咗詞嘅歌，例如channel中最高點擊率嘅片，就係佢初期改編《多啦A夢》主題曲，抽亞視水嘅〈亞視主題曲〉。當時佢係喺高登搵巴打絲打幫手代唱再自製簡單MV，自己冇出過鏡嘅。「我中學開始就鍾意改歌詞，會喺本簿度寫低，啲同學得閒就會攞嚟唱。我都參加過1次學校嘅舊曲新詞比賽，重奪得最勵志歌詞獎。不過呢樣未算爆，我試過同個friend用啲5蚊1支嘅mic，錄自己改詞嘅K歌入電腦，再用小畫家好粗劣咁自製封面，燒咗10隻碟出嚟賣俾同學，5蚊隻。全部都係我哋自己唱番，好難聽，又竟然真係有人覺得搞笑而買，10隻最後全部賣晒，有啲同學到而家都重keep住。」
用《多啦A夢》主題曲改編而成嘅〈亞視主題曲〉，薑檸樂將張家輝喺電影《賭俠1999》中喺天台駁天線嘅經曲畫面同對白：「X你個街！亞視嚟嘅喂！」夾入首歌度，極之抵死。目前點擊率已超過102萬。
冇天分作曲
薑檸樂指自己一向唱歌都難聽，重笑啲網民，話佢哋最近留言讚佢唱得好咗，實在莫名其妙。「反而我1年前正式跟老師學結他，有網民發現我彈結他進步咗，呢樣嘢我真係好開心，代表我嘅努力冇白費。」
既然學緊結他，自己又咁鍾意填詞，何解唔曲詞都包辦晒？佢就話自問冇呢個天分。「我唔係好識諗新旋律。我鍾意作詞多啲，最崇拜許冠傑、林振強、林敏驄，我覺得佢哋寫抵死嘢又得，抒情嘢又得，好犀利！我都好希望可以做到佢哋咁，不過要睇多啲詞同埋書嚟豐富自己先。」
薑檸樂大專喺IVE讀工商管理，畢業後做咗3年共兩份會計工，之後佢話頂唔順辭職，希望投身創意行業，嗰排失業幾個月。「辭職之後都驚搵唔到工，所以2012年嗰時我開始自拍片放上YouTube，第1條係講我跑步踢波嘅生活片，連埋之後拍嗰幾條片其實都超級無聊，但而家反而諗唔番嗰啲橋。」
薑檸樂上年終於正式為商業歌填詞，佢同本地樂隊ToNick主音結他手恆仔一齊填咗ToNick嘅〈邊個知道〉，亦有份參演MV。
填詞搵唔到食
失咗業3、4個月，薑檸樂搵到份喺網上電視台度做creative writer嘅工。「做咗10個月，網上電視台冇乜人睇，基本上冇乜機會可以俾我發揮到，日日返去就係打字幕，學唔到嘢，唯一就係練到我而家打倉頡打得好快。自此之後，我就全心做個全職YouTuber。」
佢話做填詞人係佢嘅夢想，佢希望自己有朝一日可以名正言順有填詞人呢個身分。「但係我知道填詞搵唔到食，所以我都想未來有自己嘅crew，做production工作，接拍網片。我哋YouTubers最清楚網片個形式，例如長度、節奏、笑點，要點樣先至可以吸引人睇同大眾嘅口味。」
機會從來係要自己爭取，好似2010年香港第1代YouTuber Eminleo嘅「爆笑字幕版足球小將」就喺網上非常受歡迎，薑檸樂就send過佢自己改編嘅主題曲俾Eminleo，兩人因而認識。
薑檸樂同志同道合嘅另一YouTuber小為合作開咗個channel「 WUARVIDEO」，最新1條片係講述假設佢哋10年後見番，回憶番10年前一齊拍片嘅趣事。
