黃翠如近日為
無綫新劇《
過街英雄》四出做宣傳,幕前黃翠如努力鑽研演技,而在幕後現為人妻的翠如BB,也有努力跟老公
蕭正楠學買餸,日前記者就影到他們倆公婆就到街市
拍拖兼買餸,期間,蕭正楠仲教老婆點樣揀海鮮。
撰文、圖片:東方新地|編輯:八卦妹(原文刊於:東方新地)
黃翠如欠缺自理能力 蕭正楠傳授買餸之道
蕭正楠前年於《萬千星輝頒獎典禮》台上宣布與黃翠如已在新西蘭註冊結婚,又當眾邊咀老婆邊表白:「多謝你令我學識去照顧人,令我學識做個更加好的男人。」好男人一做便兩年,蕭正楠甚為享受做全能老公,黃翠如就繼續依賴,日常生活不能沒有蕭正楠。
18年在新西蘭旅行註冊結婚,19年在峇里補辦婚禮,蕭正楠與黃翠如一凹一凸變成絕配,對於老婆欠缺自理能力,蕭正楠並不介意,他願意肩負起照顧她的責任。
疫情下要避免出外搵食,蕭正楠與黃翠如選擇一齊出動去街市買餸,順便當拍拖節目。
日前黃翠如為無綫新劇《過街英雄》做宣傳,日日有老公住家飯食的她氣色非常之好,不過玩遊戲時都係姐手姐腳。
黃翠如形象健康粉絲多,這日她駕車離開將軍澳電視城,一出門口即被大批粉絲攔截,她無懼疫情亦無隔開1.5米,停車與粉絲傾偈又合照
更烏低身就殘疾粉絲,親和力滿分。
返回大埔康樂園後,黃翠如讓出司機位畀老公蕭正楠,兩公婆一齊出發去太和邨街市。
黃翠如做人妻唔識煮飯連買餸都搞到一鑊粥,好彩有個入得廚房的廿四孝老公做她的最強後盾。日前黃翠如出席完新劇《過街英雄》的宣傳活動,即返回大埔康樂園愛巢會合蕭正楠,二人駕車到大埔太和邨街市,現場所見,蕭正楠熟晒地頭,師奶上身帶住黃翠如行勻成個街市,教她如何挑選平靚正海鮮,買了新鮮蜆、蟹、魚之後,又買了大量丸類及各種打邊爐食材,兩公婆邊行邊商量默契十足,疫情下黃翠如更慎防錢有毒,把所有買餸錢及找回來的錢都放在一個透明的密實膠袋內,自理低分王防疫冇甩轆措施仲做足,應該加分。
黃翠如講過,蕭正楠係一個可以令人煩惱全消的老公,黃翠如見到老公嗒晒糖,邊行邊講笑,露出腰果眼。
入到街市,蕭氏夫婦行動好一致,不時對住食材手指指,開個環保袋都一齊,sweet到爆。
廚藝了得的蕭正楠亦是街市達人,去到海鮮檔突然師奶上身教黃翠如揀蟹同蜆。
老公負責揀靚海鮮同講價,老婆負責拎住個透明密實袋去裝住啲錢,怕街市找續的錢暗藏病毒,防疫意識好高。
街市常客蕭正楠非常熟路,帶住黃翠如走勻成個太和邨街市,不少檔主都識得佢。二人買完丸類又去買魚,為打邊爐做好準備。
黃翠如雖然唔識煮,但佢好識食,行到乾貨舖手指指要買定啲麵餅返屋企。
離開街市發現本刊記者,黃翠如上車前不忘揮手講再見,友善不拘小節可見一斑。
被催生B例牌回應:順其自然
蕭生蕭太買完餸即返家準備打邊爐撐枱腳,過二人世界雖溫馨,但傳宗接代的使命搞足兩年都未成功,令二人經常被追問生B問題,為此蕭正楠曾回應:「其實大家都有共識,都希望會發生,但我相信佢首先要暫時放棄佢嘅事業……一切順其自然。」蕭正楠再補充話如果真的生B,他相信需要更加小心,即使黃翠如榮升人母都係甩轆兼求其,樽奶擺三日會再繼續飲,蕭正楠怕BB塊面會變綠色,他相信到時要同時照顧兩個人,責任會更大。唔生B可以有十萬個理由,蕭正楠呢個理由好充份,都係等黃翠如自理能力升呢先再去諗生仔,不過蕭太今年10月已經39歲,蕭生要加速鞭策老婆先得喇!
即將步入39歲的黃翠如,每次見到契仔(閨密吳天瑜之子)都愛不釋手,早前被追問B計劃,她表示拍完《七公主》就到蕭正楠拍《飛虎》,timing又唔啱,睇怕好難成事。