蕭正楠等做老竇 36歲翠如減產趕生狗仔
text-東方新地photo-東方新地、新傳媒資料庫、黃翠如ig
蕭正楠 翠如 趕生B
早前蕭正楠與黃翠如完成手頭上工作向公司請假外遊,去過日本與英國等地,盛傳已在外地註冊,不過回港後例牌否認,翠如還說笑表示要認真考慮一下向蕭正楠求婚。一直有指翠如BB事業心重,唔想收山做人妻,想在事業上搏殺多幾年,但時間唔等人,已經36歲的翠如與蕭正楠都鍾意小朋友,最近亦有意生B,希望出年狗年生個狗B,並由Edwin負責努力工作擔起頭家!
翠如BB緊張護肚
早前翠如出席完活動,本來穿上4吋高踭鞋的翠如BB完場即換上平底涼鞋,之後駕車去清水灣半島接好姊妹唐詩詠,見面後即讓出司機位,等詩詠負責做司機。二人前往將軍澳超市,翠如全程拎住手機狂傾,詩詠負責揀哈密瓜與蛋糕,其時超市人來人往,只見翠如曾出手護住腹部位置。據知翠如跟詩詠情同姊妹,約定將來有子女都會互相上契!
蕭正楠再次否認已婚
早前本刊捕獲翠如與蕭正楠雙雙步出華景山莊愛巢,向來非常大方的翠如,見到記者在場突然與蕭正楠保持距離,蕭企定定即場接受訪問時,但翠如就離奇地彈到勁遠閃人!蕭公子先係再次否認兩人已婚:「佢 (曹永廉)真係口不擇言,我話咗佢!搞到個個都以為真,好多客戶打去公司話要贊助我哋。多謝晒咁多客戶同朋友畀面啦!但時機仲未到。」
蕭正楠唔撐女友做視后
另外提到翠如今年奪視后呼聲高,蕭公子就話翠如喺TVB日子尚短,仍然係學習中,但認為佢喺《使徒行者2》的確有好大進步:「佢演呢啲傻大姐夠晒入型入格,因為佢真係傻架嘛!演番自己就搞掂晒!」但同視后仲有一段距離。
翠如BB承認會減產
翠如BB日前出席活動,接受本刊訪問時承認來年會減產:「係!係想停一停嘅!有一啲其他嘢都想,想做啲慈善嘅嘢!」不過就表示未諗有BB後會唔會停工湊B。至於被問到認為自己與蕭公子會唔會係一對司職的父母,翠如表示真係幻想唔到,亦未見過蕭公子同小朋友相處,所以真係唔知!