胡定欣上載超重口味濃妝相慶祝39歲生日 前男友秒like讚好 網友:完全唔認得!|頭號粉絲
撰文、圖片:東方新地|編輯:八卦妹(原文刊於:東方新地)
胡定欣迎39歲盡顯成熟味
繼早前陳自瑤晒古典性感美照慶生日,明天39歲牛一的胡定欣亦唔執輸,今午晒出成熟美照,暗紅唇膏、極濃眼妝下盡見成熟美,雖然看上來極重手執相,甚至有點難以認得出其本人,不過一班好友亦秒like,包括胡定欣音樂人前男友陳明道。
長休後回歸無綫
「胡說八道」兩位好姊妹胡定欣及李施嬅,近日同樣外闖夢碎落實回巢,繼今年約滿無綫的胡定欣,縮沙放棄過檔古天樂的經理人公司,選擇留在無綫大樹好遮蔭,去年憑《金宵大廈》爆紅的李施嬅,亦吃回頭草簽約無綫姊妹公司邵氏。去年四月約滿離巢的李施嬅,簽美國經理人公司外闖,更透露會拍加拿大劇集及美國電影,外闖躊躇滿志,卻因新冠肺炎疫情大失預算,外國開工遙遙無期,唔想齋坐等運到,同好姊妹胡定欣決定一齊留港發展,搵大台做靠山,更獲加薪兼保證有工開,都算係賺咗!
![去年四月離巢無綫的李施嬅,宣布簽約美國經理人公司準備大展拳腳,計劃今年飛美拍電影及到加拿大拍攝電視劇《Blood and Water》第三季,不過因新冠肺炎疫情未受控,海外開工遙遙無期,近日亦落實簽約無綫姊妹公司邵氏,尋求新出路。而兩年前已計劃外闖的胡定欣,原本傾好過檔古天樂經理人公司,不過面對近期因新冠疫情引發全球經濟不景,胡定欣都唔敢冒險過檔,又獲無綫加價,寧留娘家但求穩陣!](https://imgs.orientalsunday.hk/wp-content/uploads/2020/07/wu_17884297975f19648da5f46-683x1024.jpg)
李施嬅海外開工遙遙無期
今年三月李施嬅已啟程加拿大開工拍劇集《 Blood and Water 》第三季,不過只拍到三分二,新冠肺炎疫情突然加劇,劇組緊急叫停,李施嬅亦被迫返香港等消息。據知情者透露:「之前五月疫情稍緩,Selena 仲諗住好快可以再開工,已經諗好等劇組一通知就即刻飛去加拿大為套劇埋尾,拍完先返香港拍《金宵大廈2 》。」但計劃追不上變化,近日新冠肺炎疫情告急,美國和歐洲成重災區,海外開工遙遙無期,李施嬅外闖計劃一波三折,亦只好改變策略。據好友透露:「美國同加拿大疫情仲未受控,劇組都覆唔實幾時可以埋位,Selena 都唔想無了期咁等,怕再拖落去,自己好快被遺忘!加上樂小姐一路傾佢都好有誠意,畀好大自由度,而且簽邵氏彈性大,樂小姐講明,如果將來佢要去外地拍嘢,都可以遷就時間,加上可以拍到內地合拍劇,攻內地市場唔成問題,喺依家呢個時勢,真係最穩陣!」
胡定欣兩年前已傾古天樂
都係嗰句「人算不如天算」,相比去年才上位的李施嬅,早已是無綫兩屆視后的胡定欣,自然更大野心向外闖,兩年前拍完劇集《包青天再起風雲》,已經有其他公司向定欣招手,當中和古天樂經理人公司更一拍即合,本已計劃約滿即過檔。據知情者透露:「兩年前娛樂圈仲好蓬勃,電影市道暢旺,定欣同古仔傾約,希望可以拓展電影市場,又可以返內地拍劇拍電影做商演,發展大計一大籮,嗰時佢都諗住休息充電,等之後全面投入工作,所以同無綫未約滿都冇再接劇,又有邊個估到年頭會出現新冠肺炎,好多內地工作都停晒,電影冚晒旗,加上無綫一路都好落力留佢,價錢仲比之前高,既然形勢大變,定欣都唔想喺呢段時間冒險出去闖,最後放棄簽古仔,留番喺無綫。」路不轉人轉,拐過彎何嘗不是辦法?明天一定會更好!