反起跑線聯盟2 朱茵被爆拍《閃電傳真機》秘聞 曾獲節目組優待唔使做1件事
朱茵 初入TVB要半工讀
現年52歲的朱茵於91年正在修讀演藝學院二年級時,便獲監製睇中簽入TVB,以學生身份擔任兒童節目《閃電傳真機》的主持,她憶述:「因為兩邊走,學校有習作,又要返無綫拍兒童節目,同學之間好難明我點解要拍戲,但我逢一至五返學,周六日先拍到節目。」
![朱茵 朱茵和譚玉瑛這兩位昔日拍檔一見面就熱情打招呼,阿譚透露:「自從佢生咗囡囡之後就冇再見過佢。」(圖片來源:新城廣播)](https://imgs.orientalsunday.hk/wp-content/uploads/2024/08/01_139704933166b5de5e199ae-777x1024.jpeg)
譚玉瑛爆同事對朱茵有微言
朱茵直言當年半工讀是她人生一段最辛苦的日子,譚玉瑛則大爆當時同事都對朱茵有微言:「對我哋呢啲返工嘅人來講,你點解咁有優待,唔使返外景。」又爆當年朱茵拍節目時,經常追問她收工時間:「佢都好抓緊時間,成日盤算幾時收工,但我又計得好準。」朱茵則解釋全因要同時照顧工作和學業,獲讚勤奮。
![朱茵 主持何基佑(左)見到朱茵,立即變身小粉絲,主動要求簽Yes卡並合照。(圖片來源:新城廣播)](https://imgs.orientalsunday.hk/wp-content/uploads/2024/08/03_168175796066b5de6d6e791-1024x768.jpg)
King Sir 幫手簽合約
朱茵被問及當年為何會拍兒童節目,她笑言自己也不清楚原因:「嗰時無綫、亞視都入過學校揀啲啱佢哋節目的人,我係被揀選嘅其中一個,但我只能夠拍兒童節目,仲記得我張合約係King Sir(鍾景輝)幫我簽,拍到後尾半年就快畢業,我就同無綫講我要返去畢業,因為我要攞到張畢業證書。」
![朱茵 朱茵主持《閃電傳真機》只有約半年時間,唔知係邊位同事對佢有微言?(圖片來源:TVB)](https://imgs.orientalsunday.hk/wp-content/uploads/2024/08/11_109899835066b5e1e1c4d14.jpeg)
朱茵與潘燦良合作拍新劇《反起跑線聯盟2》
由劉偉恒執導的《反起跑線聯盟2》一眾小朋友由幼稚園升讀小學,朱茵就飾演劇中一名嚴肅的小學老師,與同住胞妹經常起爭執,而朱茵和潘燦良在劇中更有大量對手戲,潘燦良將由一位「虎爸」變成暖男爸爸。儘管相隔13年才再度拍港劇,但朱茵表示沒感到吃力:「因為自己鍾意,同一班同聲同氣嘅人一齊做嘢好開心,而且香港製作真係好快手,我哋都冇乜甩過,係一個好好體驗,未來日子都好期待好劇本、好角色。」
![朱茵 朱茵和潘燦良在《反起跑線聯盟2》中有大量對手戲。(圖片來源:新城廣播)](https://imgs.orientalsunday.hk/wp-content/uploads/2024/08/05_150031405866b5de7adc2d6-1024x703.jpg)
朱茵為演好角色參考愛女老師日常舉止
《反起跑線聯盟2》由新加入的朱茵飾演作風嚴厲的冼老師,其高壓的教育方式令眾家長和小孩叫苦連天。朱茵坦言為演好今次的老師角色,參考了愛女老師日常舉止:「因為由幼稚園開始都成日接觸老師,腦中都有唔同嘅形象,真係幫咗我嘅演出。依家囡囡都大個咗,見到呢班小朋友好得意,好似囡囡童年時候,忍唔住睇多啲、望多啲。」睇資料朱茵囡囡黃鶯現在12歲大,已升讀中學。
![朱茵 朱茵曾與老公阿Paul及愛女黃鶯參演內地真人騷《想想辦法吧!爸爸》,網民都大讚朱茵教女有方,將囡囡教得十分乖巧懂事。(圖片來源:微博@朱茵)](https://imgs.orientalsunday.hk/wp-content/uploads/2020/11/b2_1196a_funn_p44_45_9394007565fa26522740fa-1024x768.jpg)
氣場強勁人未到小演員已自動噤聲
而為了令小演員更易投入角色,朱茵稱在戲內外都保持威嚴:「頭先導演話我嚟緊喇,小朋友即時靜晒,因為頭兩日我唔太敢笑,令到有返老師嘅距離感,佢地都易入戲啲。不過之後幾日我都寬容啲,因為唔想佢地真係驚咗我。」
朱茵還表示戲中角色相對嚴肅,但現實中自己其實是一個有得傾有得講的媽咪:「有啲位會嚴啲啲啦,但唔可以比佢驚咗我,因為驚咗就唔再講真話,同埋自己做錯咗會Say Sorry,令佢知道呢句說話唔係咁難講。」
![朱茵 相隔13年再接新劇,朱茵表示全因被劇本吸引。(圖片來源:劉偉恒FB)](https://imgs.weekendhk.com/wp-content/uploads/2023/08/370498218_845460096940880_3444244143890888147_n_9962526164e726eb1e166-1024x1024.jpg)