愛回家|張景淳正式解凍 劇中被鬧爆句句有骨?!
廣告
張景淳早前傳因遲到問題而被TVB高層下令雪藏,搞到劇中剛與呂慧儀新婚不久就被迫「異地戀」,「龔水」戀一直二缺一。終於係網民千呼萬喚,再加上指呂慧儀曾代「老公」張景淳向公司救情下,終於解凍!不過雖然如此,但播出解凍最新一集後好多網民都猜測只係短暫「回家」?
張景淳返嚟只係鋪路再入雪櫃?
喺星期一晚(9日)嘅《愛回家之開心速遞》講同若水新婚嘅龔燁去咗外國工幹遲遲都未返,原來係因為俾大小姐龍力蓮取消咗張頭等機票,搞到佢要喺歐洲再搶機票,之後飛咗足足76個鐘先返到香港,一「復出」就勁狼狽!於是龔燁返到公司即離棄大小姐,投城細龍生,幫細龍生爭接龍繼承人嘅位置。點知細龍生冇救佢不特止,仲話要派佢去更遠嘅獅吼共和國傾生意,唔通入完雪櫃唞啖氣又要罰過?
![張景淳 由歐洲工幹返嚟嘅龔水話用咗76個鐘先到香港,有網民話以為佢去咗烏克蘭](https://imgs.orientalsunday.hk/wp-content/uploads/2022/05/screenshotter-mytvsuper-2753496556_23593083562791744402bb-1024x576.jpg)
劇情要猛咁向高層擦鞋仲被鬧「契弟」
為咗唔想再被調離香港,張景淳立即再次轉投大小姐陣營,唔止送大禮,仲落足嘴頭猛咁擦鞋,處於高位嘅大小姐當然要擺個姿態,看兜口兜面鬧張景淳做「契弟」,識做嘅張景淳當然要硬食啦!最終大小姐都心軟,成功爭取張景淳繼續留喺香港唔使出國工幹,執返身彩!
![張景淳](https://imgs.orientalsunday.hk/wp-content/uploads/2022/05/photo1652106249_16224625436279241c497fe-1008x1024.jpeg)
龔燁被細龍生擺上枱,提議調佢去獅吼共和國傾生意(圖片來源:《愛回家之開心速遞》截圖)
網民擔心張景淳只係短暫「回家」
對於張景淳「回家」,有網民就好開心,仲讚佢可愛,問係咪只係返嚟一集,亦有人好投入咁提議龔水辭職,唔好再喺啲咁刻薄嘅公司做。早前張景淳被傳因為「遲到」而被停工數月,不少心水清嘅觀眾都笑言劇情擺明就係對應佢近幾個月嘅情況,先是「遲到」失勢被調離,有機會「回家」又要扭計,結果爭啲繼續入雪櫃,好在最後張景淳都知錯跪低兼自嘲「契弟」,馬死落地行呀!不過另一方面,有唔少觀眾就提議不如「龔水」兩公婆「移民」一齊消失消,事關呂慧儀今集實在太嘈喇!
撰文:東方新地圖片來源:《愛回家之開心速遞》截圖,LIHKG 討論區,香港高登討論區