愛情戲多過救護戲 網民：《跳躍生命線》改名做《跳躍感情線》
撰文：東方新地｜圖片：劇照、連登討論區｜編輯：乖乖l（原文刊於東方新地）
愛情戲多過救護戲 網民：《跳躍生命線》改名做《跳躍感情線》
跳躍感情線一：卓家傑、章可祈
話說卓家傑（何廣沛飾）出班後被派到去長沙灣分局，係嗰到認識女鐵騎救護員章可祈（劉佩玥飾），好快就展開追求行動。可惜無論一齊去Camp、約食飯定係上埋人哋屋企揸橙汁，對方都擺明有意但係未有所表示，似係想玩多幾集啵！
追女仔都要由長沙灣跑到去西貢扮偶遇，學嘢啦！
原來係想約食飯，不過女神約咗其他男人，仲要係自己同事添！唔知仲要兜轉幾多集先有機會表白呢？
有咩慘得過女神仲要上埋人哋車，留低你自己一個孤伶伶啊？
跳躍感情線二：譚家俊、向滿月
譚家俊（羅天宇飾）同向滿月（陳瀅飾）係由細到大玩開嘅好朋友，一齊食飯已經係日常活動，家俊入院時滿月都有去探佢！而滿月對家俊產生情愫就係一次兩個人坐喺樓梯食蕃薯嘅時候喇！
不過最新嗰集就講到滿月知道家俊隱瞞嫲嫲（羅蘭飾）有肺癌，所以嬲到打咗佢一把仲話唔想再見佢。
鏡頭一轉，家俊又去咗滿月屋企食飯，不過滿月仲未嬲完，趕咗家俊走，睇嚟又要花一段時間去交代佢哋點和好喇！
跳躍感情線三：麥在田、文暉
麥在田（馬德鐘飾）因為一次愛車壞咗，拎去車房修理時間接認識咗文暉（張曦雯飾），之後文暉又因為某啲原因而寄宿喺在田屋企。兩個人朝夕晚對，自然產生感情。
最新發展就係在田坐爛咗文暉副眼鏡，所以陪佢去配返，兩個人對望時產生觸電感覺，非常尷尬。
文暉忍唔住向在田表白。
文暉表白完又話想維持現狀，因為佢都準備離港。真係神又係佢，鬼又係佢。
跳躍感情線四：呂劍雄、況晴
喺一次同事聚會入面，雄姐（張彥博飾）同況晴（李靖筠飾）一齊彈結他唱歌，發現大家都鍾意音樂，自然有共同話題。
最新劇情發展就係況晴主動約雄姐去睇演唱會，畀咗個機會大家，不過之後雄姐、家傑出勤發生意外……
跳躍感情線五：高行仁、麥愛花
高行仁（韋家雄飾）係麥在田下屬，每次見到愛花（張文慈飾）時總會鬧交，成對歡喜冤家咁。
最新劇情係愛花喺巴士上畀人非禮，行仁出手解圍，所以平時處處針對行仁嘅愛花開始對對方產生好感。
跳躍感情線六：卓裘、游子嵐
卓裘（李成昌飾）同游子嵐（楊卓娜飾）合租小食店，卓裘幾十歲人鍾意咗寡婦子嵐，仔仔家傑經常叫老豆去馬，不過卓裘就認為子嵐需要時間療傷，所以只係學人玩暗戀。
講咗咁耐，都係講緊《跳躍》嘅感情線，好似完全唔關救人事喎！無錯，近日就係有大量網民都喺討論區留言話套劇變咗談情，無晒救人情節，仲問係咪TVB唔夠Budget所以要削減救人個案喎！
有網民直頭提議劇名應該改做《跳躍感情線》，仲有人預計咗下集又係談情。
雖然套劇嘅感情線唔係好膠，不過網民都係想睇多啲救護Case!
