【懶人包】萬千星輝頒獎禮2018得獎名單 馬德鐘、Ali奪視帝視后 跳躍生命線獲「最佳劇集」

撰文：東方新地｜編輯：Auntie｜圖片：新傳媒圖片、電視截圖

萬千星輝頒獎禮2018得獎名單完整重溫

最佳男主角馬德鐘 《跳躍生命線》

「最佳男主角」由50歲、入行25年「馬神」馬德鐘憑《跳躍生命線》麥在田一角奪得，首次封視帝的「馬神」得獎時說：「無諗到，好開心，第一次攞獎，令我感受到咩係吃過苦先知甜嘅美好。多謝TVB，咁多位朋友，多謝珍姐，無你無《跳躍生命線》，你同我講每一句說話我都會記住，以前我年少無知唔知。多謝樂小姐，不停鼓勵我，多謝《跳躍生命線》監製、編審同埋所以前後嘅工作人員。多謝所有幫助過我嘅人，前輩，多謝我屋企人，我相信爸爸喺天上睇到，媽媽喺電視前睇到，多謝仔仔，多謝我老婆，做藝人太太真係唔容易，你照顧得我同家庭好好！」

最佳女主角 李佳芯《BB來了》

《萬千星輝頒獎典禮2018》中，李佳芯(Ali)憑劇集《BB來了》首奪台慶「最佳女主角」，擊敗陳煒、黃智雯等一眾勁敵，終於一嚐視后滋味！恭喜恭喜！

《BB來了》贏盡民心

今年「最佳女主角」競爭激烈，陳煒、黃智雯及李佳芯(Ali) 都被視為大熱，不過頒獎嘉賓歐陽震華最後讀出的三個字係「李佳芯」！Ali今年在大熱劇集《BB來了》中飾演一名新手媽媽，道盡新手媽媽的苦與樂，贏盡民心！

唔係贏在起跑線

李佳芯2016年時奪得無綫「飛躍進步女藝員」後，去年又勇奪「新加坡視后」，今年終於一嚐台慶視后滋味！Ali在台上多謝公司高層、多謝劇中幾位「允豬」小演員；之後感慨表示自己「唔係贏在起跑線，我係一舊飯，都係靠自己」

最佳男配角 梁烈唯

39歲梁烈唯入行14年，今年憑台慶劇《是咁的，法官閣下》新晉律師趙金水一角最次奪得最佳男配角。

梁烈唯多謝TVB栽培自己14年，回憶好多年前嘅失意，想放棄嘅時候有好多同事支持佢。同時，唯唯都多謝老婆同囡囡：「I love you，無咗你喺我身邊支持我，提醒我，我唔會再有呢個機會企喺呢個台上面。」

最佳女配角「大小姐」林淑敏

在處境劇《愛·回家之開心速遞》中飾演龍力蓮（大小姐）的林淑敏，唔少觀眾都覺得佢演出得好好，今晚大小姐呢個角色也為佢帶來最佳女配角的殊榮，絕對實至名歸！

林淑敏回憶八年前患乳癌時嘅經歷，多謝珍姐畀機會佢繼續開工，同時亦多謝「愛回家」製作團隊寫咗一個咁好嘅角色畀佢！

林淑敏在2010年患上乳癌，經歷過多次化療同手術切除腫瘤後，終抗癌成功！

最佳劇集 《跳躍生命線》

由馬德鐘、何廣沛及劉佩玥等主演的劇集《跳躍生命線》播出時成為全城熱話，於「萬千星輝頒獎典禮2018」獲頒最佳劇集，成為是晚終極大嬴家，宣布賽果一刻全場歡呼！《跳》劇台前幕後齊齊上台領奬，劉佩玥更哭成淚人，監製方駿釗公開多謝一眾高層後，從袋中取出貓紙：「要多謝嘅人太多，我寫低咗，唔該 Close Up大家睇啦！」

《跳躍生命線》係TVB首次以救護員做題材的劇集，播出以來深受觀眾喜愛，全劇平均總收視29.3點，成為「2018年最高收視劇集」，贏盡收視與口碑。而男主角馬德鐘亦贏得「最佳男主角」，實在眾望所歸！

最受歡迎電視男角色 《深宮計》任三恕 (馬國明飾)

繼去年憑《降魔的》馬季一角奪最受歡迎電視男角色後，馬國明再憑《宮心計2深宮計》「任三恕」奪得《萬千星輝頒獎典禮2018》最受歡迎電視男角色！！

馬明表示從未想過能再次得獎，連他自己也估是黎諾懿，領獎後他笑稱：「首先唔洗俾紙巾我，我無做代言，無收錢！我真係唔知點解會攞獎，我莫名其妙！我唔係蕭正楠，無註冊！我要多謝小青姐同《宮心計2深宮計》的幕後團隊。」

最受歡迎電視女角色 《深宮計》太平公主(陳煒飾)

陳煒憑《宮心計2深宮計》「太平公主」一角奪得《萬千星輝頒獎典禮2018》最受歡迎電視女角色！

煒哥得獎後激動爆喊，她感激TVB在自己人生的最低谷時簽了自己，「好多人都淨係知道我識做戲，唔知道我識煮嘢，喺煒哥的廚房（《煒哥的味道》）令我入屋！」煒哥又感激在《深宮計》中首次合作的監製梅小青，她說「太平公主」的對白好難背，這次演出是好大的挑戰，直言：「我背得對白好辛苦。」

最受歡迎電視拍檔 曹永廉 、蕭正楠

今年處境劇《愛．回家之開心速遞》在十個提名中更有兩對劇中拍檔入圍，包括「KC & Terry」及「大小姐 & 送水輝」，但最終被曹永廉 、蕭正楠擊敗，「最受歡迎電視拍檔」就由一對好拍擋洪永城同黃翠如頒發，蕭正楠一上台就大讚女友翠如，之後佢就好多謝公司安排曹永廉同佢拍檔。

然後蕭正楠就話有少少嘢想講，個樣仲好認真：「2018年喺我工作上有好多成就，拍咗好多好好嘅劇，做咗好好嘅綜藝節目，而喺我人生中，我都做咗一個好大嘅決定，我好想趁呢個機會，多謝我太太黃翠如。」之後全場開始歡呼，翠如仲笑到見牙唔見眼。蕭正楠又講到眼濕濕，話想準備啲好浪漫嘅嘢，所以好緊張。

蕭正楠話：「Sorry ，我係好心神彷佛，拍戲或有人嗌我都唔知，我一直諗啲好浪漫嘅嘢感動我太太，但我個腦仔有限，唔識講好多嘢，好緊張，緊張咗成晚，我都唔記得要多謝你乜嘢。我多謝你令我學識去照顧人，令我學識做個更加好嘅男人，今晚呢個承諾都好大鑊，因為全香港人都知道。」翠如終於開口：「夠喇，夠喇，頒獎禮嚟㗎。」蕭正楠即聽話﹕「多謝大家畀呢個機會我講，多謝晒！」

最受歡迎電視歌曲 〈但願人長久〉 主唱︰菊梓喬

由菊梓喬獻唱的《跳躍生命線》插曲《但願人長久》奪得，菊梓喬致謝時語帶哭腔，除了多謝公司，還感激《跳》演員的出色演出：「佢哋演得好感動，我睇佢哋演出，喊咗好多次。今晚好開心，希望可以唱多啲好嘅音樂。」

飛躍進步男藝員

何廣沛今晚台慶奪得飛躍進步男藝員獎，佢上台話：「多謝公司頒呢個獎畀我，我好感恩，由我訓練班畢業，到企喺呢個台上，我好幸運遇到好多唔同類型嘅劇本、唔同嘅角色，都好感激公司又排好多前輩同我合作，畀我喺佢哋身邊偷師，每一位都係我好好嘅榜樣， 當然要多謝我屋企人、多謝26期訓練班嘅兄弟姊妹同埋導師鄭旦瑞，旦爸，我得咗喇！」好咯，事業起飛，唔使三餐捱麵包喇！

感恩由訓練班畢業後，公司一直畀佢好多演出的機會，他不忘多謝家人、fans、以訓練班的弟兄姊妹及導師鄭丹瑞！

飛躍進步女藝員 馮盈盈

馮盈盈獲獎時一臉愕然，她上台領獎時說：「唔好意思，因為一直以嚟以為自己唔會拎呢個獎，所以冇諗講啲咩，仲諗住頒完去洗手間，我覺得自己係未夠班嘅，所以一定要好多謝一直以嚟畀機會我嘅人，我覺得自己嘅表演未夠滿分，佢哋好大膽畀機會我，嚟緊要再努力啲，先可以再進步，未來我會努力做好。」

馮盈盈話冇諗過攞獎，所以冇準備，仲諗住頒完呢個獎去洗手間。她說自覺做得未夠好，但多謝大家仍給她機會。今年馮盈盈在多個劇集如《果欄中的江湖大嫂》以及佢有份主持的綜藝節目《後生仔傾吓偈》都有亮眼表現，希望她來年繼續努力！

最佳非戲劇節目

《嫁到這世界邊端2》、《美女廚房》、《森美旅行團》、《後生仔傾吓偈》、《周遊東京》節目受歡迎程度無庸置疑！

最佳節目主持 田蕊妮《女人四十》

田蕊妮主持嘅《女人四十》奪最佳節目主持獎，阿田話個節目構思到出街一直都有份參與，她也答謝一班幕後、嘉賓，也多謝其父母！

萬千光輝演藝人大獎 薛家燕

68歲的薛家燕昨晚奪得萬千光輝演藝人大獎，家燕姐講感言時表示要感恩，演藝生涯已60年實在不簡單，又特別多謝曾勵珍找她拍《真情》，是她人生轉捩點！當時很辛苦，但從來都沒有跟公司說辛苦，又多謝樂小姐及余詠珊小姐給她的支持及協助，家燕更講到喊：「TVB呢個大家庭係畀我好大支持，當中包括幕後及一班合作過嘅藝人，有時唔記得食嘢買埋畀我食，我慳埋好多，我會繼續努力報答大家。」

由胡楓、黎小田頒獎，頒獎前黎小田指得獎者「事業心重」，胡楓又指她勤力，又是偉大母親，未頒已呼之欲出是薛家燕。家燕姐今次攞獎唔着登基黃袍，反而以全紅色登場。

專業演員大獎

「專業演員大獎」由盧宛茵先拔頭籌奪得，之後大會再讀出鄭子誠、歐瑞偉的名字，全場掌聲不斷。盧宛茵、鄭子誠、歐瑞偉都係經驗豐富的資深演員，奪「專業演員大獎」獎實至名歸！

鄭子誠演奸角演到出神入化，當他上台致辭：「多謝同事，攞奬我唔敢當，我只係有做演員最基本嘅態度。每個人都會受身處嘅環境所影響，我每日工作時候都遇上非常專業嘅同事們，相信大部分同事們都配得上攞這個獎。」

最喜愛劇集(新加坡及馬來西亞) 《三個女人一個「因」》

「新加坡及馬來西亞最喜愛劇集」由《三個女人一個「因」》獲得，眾演員及監製代表上台攞獎，監製潘嘉德表示：「多謝星馬觀眾支持，以及台前幕後嘅同事，黃智雯由頭到尾都冇病過，場場都有佢。」

延伸閱讀：

【萬千星輝頒獎典禮2018】入行25年終收成正果 馬德鐘憑《跳躍生命線》首封視帝

【恭喜蕭生蕭太】蕭正楠頒獎禮上公布已與黃翠如結婚！4年戀情修成正果！