東張西望丨新移民婦欲公屋加名 丈夫病逝被收樓怒斥房署做嘢慢
新移民老公患腦癌
《東張西望》最新一集講到一名新移民梁太2014年識咗港人梁生,一直未敢發展,直到2018先開始發展,同年喺香港結埋婚,之後一直申請單程證嚟港,夫婦2人中港兩地兩邊走。後來疫情爆發,出入境變得困難,梁生仲喺2021不幸患病,發現患上腦癌,梁太拎雙程證來港照片梁生。梁生本來住劏房,但因病後出入有困難,梁太就幫佢拎咗綜援,搵社工幫手6月搬埋入長沙灣公屋。
因精神狀況不佳拒絕加名
拎咗公屋之後,因為梁太係拎雙程證,未有香港身份證,所以一直未有喺公屋加名,去到11月只係得「行街紙」。梁太表示間屋雖然係梁生個名,但所有嘢都係佢搞,點解加返佢個名會咁難?之後直到梁生病重入院,梁太一邊搞房署落名的事,一邊照顧梁生,梁太當時身份證即將批出。去到梁太終於拎咗身份證時,梁太拎住身份證同埋梁生手印授權、醫生證明到房署搞公屋的事,房署職員以梁生精神情況不好,所以唔批加名一事。之後一直擾攘到11月25日,梁生離世,梁太因為梁生曾喺公屋生活過,想保留公屋,但房署要求收返公屋,《東張西望》聯絡後,房署回覆都係堅持收返。
網民今次唔撐「房署要企硬呀」
報導一出,雖然梁太情況悽慘,但唔少網民留言支持房署做法!「剛拎到身份証,如果咁都比佢拎到間公屋,真係對香港人不公。」「依個女人,全程強調公屋公屋,完全睇唔到佢有幾愛佢老公」「咁愛你老公!咁就更加要離開呢個傷心地啦」「又拎到張身份证,又拎新公屋,又拎埋綜援,又再想拎啲乜?」「又想乘機搏同情 自己本身都係大陸住緊 咁咪返去住囉」「房署要企硬呀」雖然如此,亦有網民希望梁太可以獲得一個家。