觀塘759飯堂試食報告 價廉物美？有冇伏？
廣告
759阿信屋分店無處不在，不論食品、藥妝、日用品、麵包鋪、車仔麵、雲吞麵店遍布香港各區，近日759阿信屋就在觀塘插旗，開設759飯堂。叫得飯堂，當然主攻區內打工仔，且主打價廉物美的茶記食物，常餐、燒味、碟頭飯等等。趁下午茶時段人少少，小編即拉埋幾個同事去試下有幾價廉、有幾物美、又有冇伏先！
text、photo-william
地方寬敞整潔
一貫工廠大廈內的飯堂格局，地方頗大，環境尚算舒適，近牆是4人與6人卡座，中間位置的檯與檯之間都有一定空位，不會坐得太擠擁。而藍色牆身令人醒神，用來拍照也很靚。
淡口味人士可試
瑞士汁雞翼煎蛋撈麵 $33
雞翼醃得入味，伴麵的瑞士汁只有淡淡甜味，鹹香欠奉，整體味道一般，不過愛吃清淡的話，可能是你杯茶。
新鮮感下午茶之選
一口年糕配沙律 $29（下午茶餐）
炸過的日式年糕咬開有芝士，味道不過不失，算是較新奇的下午茶食品。
炸物狂人必點
炸雞髀配薯條 $33（下午茶餐）
下午茶必食之一炸髀薯條，當然要試一試。雞髀size正常，但肉質較「削」，零肉汁，皮炸得有點脆，味道正常，而薯條未瀝好油便端出，入口有點油膩。
食物種類多元化
食物還有燒味、常餐、碟頭飯、車仔麵等可選，頗多元化。車仔麵有30款餸，選擇算很多。
入口不起眼，即使行過都未必察覺飯堂存在，不過工廠食堂不可設有招牌，759飯堂依足規定。
總結：一般茶記 未能盡顯759品牌理念
如果餐廳不是打着759的旗號，大家或者不會有過高期望。759打着「價廉物美」的品牌理念，雖然飯堂的食品價錢沒有離地，但跟一般茶記差不多，未能給人很抵食的感覺，區內要找性價比較好的茶記，比比皆是。可能新店開業只有數天，還需要時間運作順暢，望食物質素能有所提升。侍應姐姐態度友善笑容滿分，感覺不錯。
759 飯堂
地址：觀塘成業街15-17號成運工業大廈地下1號工廠單位
電話：3669 6899
營業時間：7:00am-8:00pm
內容延讀：
