荔園6月pop up回歸情陷日與夜中環

6月情陷日與夜中環！

最有香港情懷特色嘅荔園遊樂場，將會喺6月中以pop-up形式登陸中環海濱，繼摩天輪、「敖嘉年華」同馬戲團後，又一必蒲熱點，到時facebook洗版在所難免。據主辦單位講今次回歸主攻香港人，俾我哋集體回憶一下惜日情懷，行動代號「情陷日與夜中環」！

小編屬70年代「前期深」，即係生於70年代前期對香港old school事與物特別有深厚感情，因家住長沙灣，荔園更係每週必蒲。小學時阿媽逢週末會帶我去放船仔，同坐船仔，我重會伸隻手仔落水撥下撥下，以為自已拍緊MV，老實講，啲水都幾臭；

中學時開始挑戰自已極限，玩鬼屋，又老實講，小編細個時係睇電影《猛鬼大廈》午夜場都驚到唔敢自已返屋企嘅人（唔知邊套自已google下，查實係笑片嚟），玩鬼屋對我嚟講同玩X-game一樣，係極限運動，結果，真係好驚，因為入到去伸手不見五指，係驚出唔返嚟，阿媽等緊我返去食飯同睇年度盛事《十大勁歌全曲頒獎禮》㗎；

中學時就威威喇，可以自已去荔園，當然亦唔會自已一個人去啦，除一班同學去外，重會約女朋友仔去，必聽住達明〈溜冰滾族〉玩滾軸溜冰，重可以乘機拖下手仔嘛…

荔園於1997年3月31日結業，佢冇同我哋過渡回歸，回歸後香港人有開心過亦有唔開心過，就趁今次荔園回歸去開心下吧！

test-stanley photo-網上圖片