堅好食﹗榴槤水果肉餅
廣告
大老遠嘅元朗屏山，收埋唔少美食，好似地膽潮人余文樂食用嘅華嫂冰室，大排長龍先食到，大家都零怨言。既然山長水遠入到去，梗係食多啲正嘢啦﹗附近有間屏山老地方，將家庭式美食煎肉餅玩得出神入化，用榴槤、杧果、藍莓等水果做餡，聽落古怪，卻出奇地好味呀﹗
text-William Photo-Pakco
屏山爆發創意 60款神秘肉餅
肉餅，一係蒸，一係煎，材料配搭不外乎鹹魚、梅菜等，個個媽媽都識煮嘅家常菜。不過嚟到屏山老地方，佢嘅肉餅款式，你可能聽都未聽過。基本嘅土魷、梅菜、蓮藕當然係必有，另有特別啲嘅海鮮系、湯料系，而最創意爆燈或者可以話係古怪嘅，一定係水果系。佢哋將榴槤、杧果、荔枝、藍莓等水果做成肉餅餡料，味道唔怪，重要好好味，真係不得了。全部都係由老闆、老闆娘同大廚精心研究嘅成果，唔止有行得好前嘅創意，重有試新嘢嘅膽色。
屏山老地方開咗4、5年，又叫得做肉餅專門店，前前後後都推出過50、60 款肉餅，係咁易講啲款式出嚟，恐怕你都會淆淆地，菠菜芝士、藍莓芝士、蟲草花膠粒、孜然羊肉、夏威夷果仁脆脆、蝦子黃金粟米、潮洲韭菜蜆肉……（係咪一路 驚一路心郁郁好想試呢）不過每日嘅款式，要睇當日有乜時令食材，令感覺更神秘。
＞
內容延讀：
＞另一估唔到肉餅飯 原來係蛋糕
＞茶記騎呢嘢食 重有呢10款
賣相平凡 味道驚喜
創意嘅嘢有時一發不可收拾，屏山老地方唔止肉餅有特色，其他小食都好有驚喜。好似茶記必有嘅雞翼，佢就做成冬蔭功味，又唔用方包，改用牛角包做三文治，直情話佢fusion都得啦﹗如果去到，當日嘅肉餅款式唔係你杯茶，都唔緊要，大量小食俾你揀，一樣會食到嘩嘩聲。
