【西貢最正新蒲點！Tikitiki Bowling Bar】2萬呎齡場x酒吧

你鍾意碌齡？但又鍾意蒲吧飲兩杯？溝埋佢吖笨！西貢近日就開咗間齡場 x 酒吧嘅Tikitiki Bowling Bar，佔地成20,000幾呎，成個場分為5大區，包括室外、內酒吧連餐廳、音樂廳同佈置到好似disco嘅保齡球場，Tikitiki Bowling Bar已經開張試業，場內嘅酒吧同餐廳亦會喺今日開始陸續提供食品同飲品，保齡友或鍾意飲兩杯人士快啲落去碌／飲番轉啦！

text-專題組

Tikitiki Bowling Bar總共有10條賽道，特別設計嘅燈光同正到爆嘅裝修，再加上球道旁嘅酒吧供應小食同飲杯（有串燒同漢堡包食），喺呢度碌齡就好似去咗六星級酒店嘅lobby lounge打保齡咁！

保齡球賽道收費為$300/1小時，（已包租鞋費），每條賽道最多可以4p，呢排推廣期間重有package，$400玩1個鐘再包2杯飲品，或者$500/玩1個鐘包4杯飲品。

都話咗呢度係齡場＋酒吧，呢度嘅酒吧亦佔咗好大部分地方，無論裝修同酒嘅種類，絕對唔會差過任何一間老蘭酒吧。呢度重有專業調酒師駐場，佢哋可以調出好多好玩又好飲嘅cocktails。