西營盤小區單車店 BIKEAHOLIC
廣告
對於住慣舊區嚟講，以前落街有士多、文具鋪、茶餐廳等等，全部都係細鋪頭，好地踎。作為街坊街里，大家經過見面都係打下牙骹吹吹水，有需要時唔使出晒sales口吻都會幫襯。呢種形式嘅小社區，香港正陸續消失，你問我嚮唔嚮往？好嚮往，但可以點做？唔知。但有人選擇出走，有人選擇經營。喺01及02年曾於紐約州連續贏得UCi MTB World Cup DH Stage Champion、到過台灣鬥過商場downmall賽、為電視劇集做單車特技替身、喺單車界非常出名嘅車手鍾伯鍵（Patrick），就喺上月選址西營盤，並開設自己第1間單車店BIKEAHOLIC。
text – England photo – Tung
主力維修服務
香港見到嘅單車鋪，一般都係賣車居多。始終賣車，利潤高。不過BIKEAHOLIC有鍾伯親自坐鎮下，店鋪賣點就當然以砌車及維修行先。至於維修範疇，基本上所有RB、MTB、FG、BMX都冇問題。不過搵得鍾伯tune車，MTB一定最fit！
鍾伯：「我理想中嘅單車鋪其實係可以為街坊街里整下單車，解決各種單車小問題。雖然我係踩Downhill車為主，但我覺得單車其實係生活工具，複雜嘅RB、MTB、FG、BMX車我固然識整，我簡簡單單換條鈴、調校轉波、執順架車，見到架單車再上路，其實都好有成功感。因為，我覺得我呢世同單車已經分不開。」
法國BOS認可維修店
踩開山地車嘅朋友都知道法國BOS前叉及尾震屬業界頂級之選，而鍾伯已正式成為BOS官方認可維修地點。上月更到印尼峇里深造BOS嘅Aisa seminar training（細圖），BOS用家以後維修定保養知碇。
[lead]null[/lead]
港鐵沿線車鋪
以為同你講去西營盤，應該會嚇窒你。不過自12月尾堅尼地城港鐵線開始通車後，港島西一帶開始吸引更多外來人流。而其中西營盤站亦於上星期日（3月29日）正式通車，大家想去BIKEAHOLIC，只要喺西營盤站C出口5分鐘路程就到。就算非附近居民，搬架車去整都方便。
BIKEAHOLIC 西營盤兩儀坊1號 2559 0977
