兩極結合優皮製波鞋大檢閱

太極生兩儀，兩儀生四象。

原本以為皮鞋同波鞋就好似一陰一陽，係兩個極端，但近年兩者界線愈嚟愈糢糊，早前有Cole Haan同PRADA將皮鞋波鞋化，近年更有HENDER SCHEME同New Balance等鞋牌用優質皮革造波鞋。或者係透過鞋種「crossover」，配出更靚同更耐用嘅新鞋，又可算係尋找創作新可能，造啲以前冇見過嘅嘢。

text-AIR photo-Parco、Yuk

HENDER SCHEME

最高手工leather sneakers

HENDER SCHEME本身係日本皮鞋品牌，但幾年前創作咗「Manual Industrial Products」呢條line，用皮鞋手法造咗好幾款經典波鞋。皮鞋就皮鞋，波鞋就波鞋啦，點解造對咁嘅波/皮鞋呢？一嚟好睇，二嚟普通塑膠波鞋壽命唔長，設計師Ryo Kashiwazaki就諗到用造皮鞋嘅方法造波鞋。HENDER SCHEME大部分型號都係以冇染色嘅純皮製造，只有部分型號會加上cushion或者魔術貼，令用家着得舒適。由於手工繁複（普通波鞋得1至2塊皮，複雜波鞋卻可以多幾倍），加上皮靚，價錢屬偏貴，不過既襟着又好睇，都係嗰句，一分錢一分貨。

護理tips：

原色皮愈着愈深色同令，所以唔需要特別上油，但如果放太耐先再着驚有裂紋，可定時搽啲潤膚膏令皮革保持滋潤，如果污糟咗則可試用沙膠擦走。

New Balance 「Horween」M998 頂級牛皮氣

作為「總統跑鞋」，New Balance一直都十分着重造工及用料，尤其美製系列，更深得對品質有要求嘅人嘅肯定。今次New Balance就將美國製造嘅M998推上另一層次，採用世界首屈一指嘅芝加哥皮革廠Horween出產嘅皮革製作，其皮革極具油分，非一般可比擬，所以今次呢對M998一攞上手已知唔簡單，即感受到一股高級「牛皮氣」。或者你會話， Horween嘅Cordovan（馬臀皮）先叫頂級，但諗真啲，作為1對跑鞋，馬臀皮就會顯得過於硬身，而且Horween嘅其他皮品都係經歷多個複雜楺製過程嘅上乘出品，既然唔係1對皮鞋，又何須執着於是否Cordovan？