MeWe移民潮！唔玩facebook！齊齊改用MeWe 3大必識超吸引賣點！

撰文：Odin ｜圖片來源：MeWe｜編輯：海月

MeWe移民潮！唔玩facebook！齊齊改用MeWe 3大必識超吸引賣點！

不設實名制度

資深用家們應該都知道以前 Facebook 係不設實名制度，用戶想改咩名都冇問題，自從某段時間強制推行之後，唔少改咗筆名或者日文名嘅用家都被迫要改返正常姓名(筆者就係其中之一)，據說係被舉報所以強制更改，但點都好都會為網絡上想匿名嘅用家帶來不便。但 MeWe 就冇呢個問題，用家可以喺姓同名填任何嘢之餘，重可以將你嘅筆名、代號之類放喺個名附近，朋友要認你就簡單得多。

無廣告及自設 timeline 功能

自從 Facebook 接連強制更新後，唔少用家都被迫硬食唔少廣告，加上 Facebook 自設「讀心功能」，身邊有唔少人話嗰頭同朋友傾完嘅話題，嗰頭喺 Facebook 就見到類似廣告，嚇到個心都離一離。 MeWe 冇廣告之類，收入主要靠提供網絡服務，對輕度用家嚟講可以講係完全冇影響。至於 timeline 方面相信 Facebook 個界面一直都為人所詬病，除咗混亂之餘有時想搵返朋友嘅 post 都會俾好多多餘資訊及廣告狂洗。 MeWe 就將一切化繁為簡，撳一下 timeline > Feed 選項就可以揀選 All 、 Contacts 、 Groups 及 Pages ，界面簡潔易用，一鍵輕鬆切換，界面重可以去 MeWe Store 買唔同嘅 Theme 隨意更換。

Group Chat 投票自由度大

MeWe同Facebook開Groups方法相當類似，想增加私隱入Group前需要回答問題先會作考慮，重可以加 #Tags 方便搵返相關內容，如果你怕 Group Chat 成日彈通知，重可以去 setting 入面設定你每個 group 所需 notifcation 。至於投票方面 Facebook 現行最興就係 A餐心心 B餐笑哈哈，而 MeWe 就可以任意喺你嘅 timeline 、 groups 以及 pages 隨時選擇投票選項，最多可設 20 個加設任意 emoji 嘅選項，重點係唔再好似 Facebook 咁局限只有版主先可以設定投票 post ，真正達到一人一票任投方案。

總結

整體嚟講一般輕度用家使用問題暫時不大，當然 MeWe 系統重存在唔少 BUG ，例如有用家就話聊天系統會被刪除不獲通知，建議唔好用 MeWe 嚟私下交易以免無得留「底」，做唔到事後蒐證咁話。另一方面 MeWe 開專頁需要收USD 1.99一個月，頭30日免費，但至少唔會出現 Facebook 壓榨「接觸人數」問題，達到出 post 追隨者都可以全數睇到，值唔值就要睇下你點睇。