【Dispo】名人爭住玩！復古仿菲林App《Dispo》免邀請碼教學懶人包

復古仿菲林相機App《Dispo》近排爆紅，上架不足一個月就突破百萬下載量，其實坊間都唔少模擬菲林相機曬相嘅復古相機App，或者影成即影即有相片樣，但近期最hit嘅絕對係呢款《Dispo》，連韓星BLACKPINK、歐美歌手Selena Gomez、Gigi Hadid都有玩，不過《Dispo》嘅做法好似《Clubhouse》咁，需要邀請碼所以未必人人玩得到，咁冇邀請碼又點算？

撰文：odin | 圖片來源：Dispo截圖、姜濤IG

【Dispo】名人爭住玩！復古仿菲林App

近期新的相機App《Dispo》引發熱烈討論，同《Clubhouse》一樣都需要邀請碼先可以玩，但發布冇幾耐就直線衝上App Store嘅5大照片及影像應用程式排名，僅次於Google相簿，《Dispo》會模仿菲林相機，影完相需要一定時間嘅「顯影」，所以影完相要等到隔日朝早9點先可以睇到張相。《Dispo》嘅創辦人係一位知名YouTuber「David Dobrik」，想從《Dispo》帶出簡單嘅拍攝概念，程式裡面利用取景器、控制變焦及閃光燈根據個人需要拍攝照片，並將照片放置在不同菲林裡面，等待相片「顯影」並出現喺應用程序後，《Dispo》用家就可以選擇發佈喺其他社交平台上面。

【Dispo】免邀請碼教學懶人包

與其話《Dispo》佢係仿照菲林相機影相App，佢更加似係個社交平台，《Dispo》玩法有啲類似IG，用家可以分享自己影嘅菲林相，再從中結識到其他《Dispo》用家，實行以相交友，至於《Dispo》邀請碼部份，由於用家初使用《Dispo》需要好似《Clubhouse》咁需要邀請碼，玩家需要透過朋友發簡訊邀請先可以加入《Dispo》並進行拍攝，每個人可獲得20個邀請名額，如果冇邀請碼咁點算？經實測《Dispo》只需要登記Snap帳號後就可直接使用，成功skip邀請碼部份。