【網紅】網紅效應大熱天時深圳大排長龍 爭相打卡居然為咗杯咁嘅嘢 黃牛一度炒到500元人民幣

撰文：odin | 圖片來源：微博截圖

【網紅】網紅效應大熱天時深圳大排長龍

國內擁有「中國美食迪士尼」稱號嘅網紅餐飲店「文和友」尋日喺深圳開業，網上攞籌排隊一度排到5萬幾，店門外面排住成萬人，唔少顧客甚至排到馬路邊、河邊等。至於呢杯嘢有幾把炮？呢間「網紅奶茶店」除咗引來萬人排隊之餘，一杯黃牛奶茶更炒到成500元人民幣(約592港元)，完美展現中國最盛行的炒賣及打卡文化。

【網紅】黃牛一度炒到500元人民幣

湖南長沙知名「網紅奶茶店」品牌「茶顏悅色」首次登陸深圳，尋日拎籌排隊嘅民眾高達四萬人，成萬人爭住排隊，位於文和友內嘅「茶顏悅色」深圳快閃店，原本20元人民幣一杯嘅奶茶，畀黃牛代購炒到成200元人民幣一杯，有網民笑稱：「由深圳到長沙南的高鐵車程約3小時，不如直接坐高鐵去長沙買，說不定你喝完回來還在排！」

【網紅】爭相打卡居然為咗杯咁嘅嘢

「網紅奶茶店」品牌「茶顏悅色」同內地餐飲企業「超級文和友」合作，喺深圳開設快閃店為期三個月，喺同一個商場入面開設咗兩間奶茶店，每人限購兩杯。喺未開業之前網上已經出現大量黃牛代購，每杯代購價為200元人民幣(約237港元)，而奶茶錢及跑腿費另外計算，有網上賣家更表示當天已經收到300多杯嘅訂單，開業首日凌晨四點已經有巿民及黃牛爭相排隊等住飲「頭啖茶」，直至下午四時內地傳媒發現，現場有代購拎住奶茶向門外排隊巿民叫賣，售價500元人民幣一杯。