黃貫中製作NFT作品多達60幅 1原因欲回購作品反被朱茵責罵
黃貫中製作NFT作品多達60幅 1原因欲回購作品反被朱茵責罵
作為首位融合AI科技呈現原創歌曲並發行NFT的華語歌手,「搖滾頑童」黃貫中(Paul)直呼好玩,也笑言與HarmoniXX的AI「合作」愉快,撞出新滋味!談到出自他手筆的《彗星》封面均與狗有緣,他笑言歌迷看到的四大結晶只是冰山一角,原來他竟親自繪畫了近六十幅畫作任君選擇:「我由出世到依家一直都有養狗,所以好鍾意畫狗,今次就順理成章做埋NFT。其實我準備咗五、六十幅畀佢哋揀,多到佢哋叫我唔好再畫,所以最後揀咗四幅。」
![黃貫中 黃貫中Paul)日前在個人畫室為《黄貫中歌曲翻唱大賽》擔任線上評審。](https://imgs.orientalsunday.hk/wp-content/uploads/2022/04/0001_1251535294626baa812fbe9-682x1024.jpg)
黃貫中製作NFT似嫁女
從傳統歌壇改為製作NFT,Paul認為元宇宙的創作環境廣闊多元,有助音樂人建構更多可能性:「做音樂做咗幾十年,突然面對一個新媒體,我哋都會緊張,一開始都會有啲擔心,唔知大家接唔接受;不過NFT音樂係一種全新面貌,見到一個全新嘅音樂展現,我覺得好興奮!」他也笑言正因為音樂NFT《彗星》限量發行2000枚,更突顯每個「寶貝」獨一無二,令他一度不捨「女兒出嫁」:「我好鍾意其中幾個版本,同事都叫我自己買返,我真係有諗過買㗎!不過後來又諗,出歌都係想畀大家聽到,無理由仲要同歌迷爭,我老婆都鬧我:『你唔好啦,搶人哋啲嘢!』」
寄望新碟成代表作
有人辭官歸故里、有人漏夜趕科場,人人都說唱片業式微、專輯沒落,Paul卻反其道而行,向廣大「中粉」投下震撼彈,有望於年內推出實體唱片!回溯上一隻個人專輯,已經是2013年發行的精選輯;十年磨一劍,全因為堅持做靚聲、重現音樂精神:「由作曲開始已經構思好每一粒音,呢隻碟做咗幾年喇,希望一路修正,可以喺今年內推出;中間有歌做好都會派台、儲夠就出碟,可能一隻、又或者兩隻,三隻都有機會㗎。」
![黃貫中 相隔多年,Paul有望於年內推出全新實體專輯!](https://imgs.orientalsunday.hk/wp-content/uploads/2022/04/paul_1310163957626baa0156128-768x1024.jpg)
Paul:出唱片係好勇敢嘅行為
至於新碟概念,Paul視它為一個交代、一份回顧,也希望藉此傳承下去:「對我嚟講係一張成績表、係我呢一生人做音樂嘅成績表,我由八幾年開始出唱片,就快四十年喇,我都希望自己有一個里程碑。有啲人會話:『你做咗幾十年仲出唱片?』因為呢個年頭出唱片真係一個好勇敢嘅行為,但係我認為我唔可以唔出,因為我係一個音樂人,希望呢隻唱片對自己有個交代。他日真係老到結他都彈唔到,我就會叫大家:『聽呢隻啦!』希望新專輯可以扮演呢個角色。」他更透露有意再出書,實行以音樂和文字為歌迷送上最窩心的禮物。
![黃貫中 Paul視新碟為一個交代、一份回顧,也希望藉此傳承下去。](https://imgs.orientalsunday.hk/wp-content/uploads/2022/04/paul_422528707626baba3f31b8-1024x938.jpg)