香港新晉銀器隱世小店Boulevard 專賣印第安風日牌STUDIO T&Y、機車風品牌13 LUCKY MONKEY

銀器近年成為不少潮男必備accessories，更有forum區師兄形容銀器為「男人嘅珠寶」。而香港近年亦陸續出現高質銀器select shop，例如今次介紹位於西營盤嘅隱世小店Boulevard。Boulevard主力售賣2大銀器界超高質品牌，分別係走印第安風嘅日牌STUDIO T&Y，以及連水行俠Jason Momoa都話「That’s Awesome」嘅機車風品牌13 LUCKY MONKEY。作為香港嘅銀器愛好者，又有更多好選擇啦！

撰文：Easy｜攝影：Easy

新晉銀器穩世小店Boulevard

如閣下喜歡去日本尋找隱世小店嘅感覺，咁Boulevard十分適合大家。新晉銀器小店Boulevard相當隱世，位於西營盤高街與第三街之間嘅兩儀坊，店舖自成一國，甚有東京小店味道。適逢疫情持續，仍然未去得旅行，不妨趁空閒時去Boulevard朝聖一下，信我！真係有去咗一趟旅行嘅感覺。

圖中為Not for Sale嘅13 LUCKY MONKEY戒指，可見手工仔細度。

曾於Goro’s擔當職人 STUDIO T&Y

如果於銀器界有一定資歷嘅朋友，相信對STUDIO T&Y絕不陌生。主力玩Navajo風格嘅STUDIO T&Y早於1977年已誕生，由職人村田高詩所創立。村田高詩曾於殿堂級銀器品牌Goro’s擔當職人，係少數可以盡得高橋吾郎真傳嘅職人。STUDIO T&Y於日本印第安風銀器界相當有代表性，與其他品牌不同之處係線條較細緻，設計上亦帶華麗風格，如加入唐草，卻同時成功保留Navajo或Hopi部族元素，包括綠松石及圖騰，絕對係高手級示範，難怪STUDIO T&Y可屹立44年。

菲律賓機車風品牌13 LUCKY MONKEY

13 LUCKY MONKEY誕生於2008年，來自菲律賓馬尼拉，以機車風飾物聞名，尤其是製作極精緻嘅骷髏戒指，曾被全球知名選物店DOVER STREET MARKET引入，可見品牌備受國際時尚界關注。13 LUCKY MONKEY由相識超過二十年，熱愛珠寶及機車文化創辦人DANTE DIZON及NOLI CORONADO共同創立。NOLI CORONADO嘅background更十分強勁，於菲律賓聖貝達大學研究解剖學，擅長手工雕刻，曾先後為《MARVEL》、《DC COMICS》擔任公仔原型師，種種因索集合，令他對骨頭及生物有一定研究，令13 LUCKY MONKEY所推出嘅骷髏戒指與別不同。至於13 LUCKY MONKEY非常擅於運用物料配搭，製作出不同顏色效果，如「甩青」、漸變色、氧化等，加上獨特打磨方法，令13 LUCKY MONKEY每件出品亦相當特別。而設計上，以極盡粗獷味道嘅機車風格，想增加剛陽味嘅男士要入手！