男友送名牌包包：你咪當ＸＸ囉！2字令港女心碎
港女拍拖8年無驚喜過
該名港女於討論區發文，以題目：「男朋友送咗個二手手袋比我做情人節禮物」向網民大吐苦水。事源女事主與大８年男友相戀已一段日子，而佢早已習慣男朋友一向欠缺浪漫及儀式感。所以通常大時大節的安排都由女事主一手包辦。細心嘅女事主更會留意到男友喜好，於佳節時送上男友期待已久嘅禮物作驚喜。但相反男友上年直頭忘記咗情人節呢個節日，更莫論準備禮物，儘管如此，女事主雖然失落但亦無怨言。
男友送二手袋回禮 港女當場呆咗？！
直至今年情人節女樓主如常安排好節目，更準備咗男朋友恨咗2年不拾得買的switch作為情人節禮物氹男朋友開心。不過男友今年依然沒有準備，但可能眼見女友花費幾千元買份情人節禮物比自己而感到不好意思，幾日後亦送咗份禮物比女事主作為回禮。女事主當時見到份禮物直言當場呆咗！事關份禮物竟然係一個頗為殘舊的二手名牌手袋，更形容手袋外觀又殘又污糟！於發文中提及：「佢幾日後拎咗個二手名牌袋出嚟，話係送比我嘅情人節禮物….我當場呆咗！二手都算，仲要係有啲殘舊有啲污糟、有好明顯使用痕跡、袋內好多原子筆化妝品漬….仲要個面我用３張濕紙巾抹都仲係成張紙巾黑蚊蚊」
男友理直氣壯：你咪當係自己孭舊咗囉！
正當女事主打算忍氣吞聲收咗份禮物就算，男友竟然不斷向佢表示份禮物價值不菲，更不滿女事主面露不悅，叫佢不要在意是二手袋，更直言：「你咪當係自己孭耐咗孭舊咗囉，而家興古著呀」！面對男友不斷 “安慰”，女事主忍唔住喊出嚟，感覺好侮辱，寧願沒有收過份禮物。而男友見女友唔中意個袋，第二日竟然拎個袋去退貨，之後仲叫女友當無事發生，唔准再嬲。
沉船港女：Condom都係我買！
網民睇完女事主發文後，留言一面倒勸佢同男友分手，更震驚男友做出送殘舊二手袋做禮物，認為男友點好意思咁做，有失大體之餘，亦不值得女事主付出。更有網民驚訝點解女事主會同男友一齊，問女事主唔分手等幾時。而女事主似乎對男友情根深種，並沒有理會網民留言，但見到有網民質疑女事主其實想洗男友錢，女事主則回覆表示對男友要求已經很低，更大爆男友內褲甚至Condom都係自己出錢買！而自己只係希望得到男友重視。
