【日本牛郎】肥大叔同老伯都有市場？大阪重口味中老年牛郎店
廣告
畀錢去夜場開心，男嘅當然係想搵年輕貌美，女嘅會搵靚仔小鮮肉，估唔到喺日本竟然有一間男公關店，主打嘅唔係靚仔型男，反而係中年大叔嘅熟男店！仲要係有市場，有囡會去幫襯，世界真係滿希望，突然間好有正能量！我哋睇吓到底係咩一回事！
撰文：馬高斯 ｜圖片來源： 日本Prince網站｜編輯：海月
大阪重口味中老年牛郎店
日本男公關，俗稱牛郎，去過東京玩嘅朋友，經開新宿歌舞伎町可能見過唔少大招牌，招牌上面係靚仔型格嘅小鮮肉。街上行過嘅牛郎首先外型係走肥亦會化妝，吸引唔少女士去幫襯。
以往嘅情況，牛郎超過30歲就好難喺呢行繼續做落去，所以20多歲係吸金全盛期。不過日本大阪就有一間男公關店打破呢個限制，招攬一班中年男公關開「熟男店」，引起日本網民注意！講到呢度，男公關呢個行業其實日本好流行，並唔係色情行業，而係專門陪女客人飲酒傾計，唔少有錢貴婦、空虛寂寞凍嘅女人會去幫襯，年中都聽唔少有女士為咗搵心儀嘅牛郎用上好多嘅錢。呢間熟男店「Prince」，店入面嘅牛郎年齡由20歲至65歲都有，重點係顏值屬普通到唔再普通個種，有啲直頭係大叔，甚至目測根本係阿伯嚟！
有唔少日本網民不禁吐糟，「我仲以為係邊間建築公司嘅臨時工名單？！」、「求奇喺街度搵個工人都靚仔過佢哋」、「可能有熟女想揀返啲相近年紀嘅熟男呢！」，難道而家興夠樣貌普通貼地夠平宜近人？定係睇得「大叔的愛」多？
有部份日本女性竟然覺得，小鮮肉牛郎太普通，反而呢啲大叔有種沉實穩重嘅感覺，畀到人一份安心感。小編望下自己個肚腩，突然覺得世界充滿希望，應該夠資格去大阪應徵！
