【張晨】「返到去記得話我知」係一句最甜蜜嘅道別句子

「伸延性」呢個Term好文藝，
說穿了只係簡單一句「Keep Contact」。

對你冇晒好感，冇晒感情，Contact就唔需要特別Keep，
兩個人道別，口講「再見」同「保重」就得，
唔需要太多未來，因此「現在」多一秒都嫌多。

但偏偏佢喺每次分別之時，
喺你準備轉身、佢開始退後之際，都會突然講一句：
「返到去記得話我知！」

有啲突兀，但你會點點頭，佢亦笑一笑。
然後再轉身、再退後。

其實呢句輕輕暗示咗好多嘢，首先佢依然擔心你安危，
驚你回程時有危險，需要一個「報平安」。

另外，就係佢自然地想同你「Keep Contact」，
於佢心中，冇嘢好得過喺約會完結後嘅一小時，
就收到一句：「喂！我返到啦。」

佢可以窩心咁覆你：「咁你快啲沖涼唞下啦！」
佢可以專登咁激你：「咁耐？果然腳短係唔著數……」

無論點覆都好，大家都又再次Contact，內容又再次伸延，直至下一次約會。

所以，有時你誤會咗呢句「返到去記得話我知」係客套話，並無照做。
佢或者會主動問你
「咪叫你返到話聲我知嘅，但你都冇WhatsApp我嘅……」

你會暗笑佢太上心，唔明佢做咩咁執著。

當然啦，對方就係對你太上心、對你太執著啫。

只要你諗返起自己曾經為某個人硬生生講過一句
「我返到再話你知呀」嘅時候，

大概就明白有一個同自己講「返到去記得話我知」嘅人，
都係一種幸福。

內容延讀：

【張晨】對阿爸阿媽嚟講，仔女請佢去旅行，已經係一個感動嘅成就

>>> LIKE我們fb <<<
fb.com/newmonday.com.hk