蔡瀾再度回應omakase言論暗諷香港嗰啲等於刑罰

香港著名食評家、香港四大才子之一嘅蔡瀾，早前於facebook「蔡瀾的日記」批評現時香港大熱嘅Omakase料理「當所有客人是笨蛋」，引起好多網民嘅共鳴、認同，言論引來專欄作家周顯撰文回擊，攻擊蔡瀾「30年前也許是權威，今天水平連普通food blogger也不如」。日前蔡瀾喺「蔡瀾的日記」解釋何謂真正的Omakase，並表示現時香港嘅Omakase料理有如「刑罰」，一眾網友紛紛大讚。

蔡瀾千字文解釋真正的omakase

蔡瀾日前更新連載專欄「蔡瀾的日記」，回應早前引起熱議嘅Omakase言論。蔡瀾就話冇諗過會引起風波，但「反對意見，我一向接受，認為多點角度來看，有趣得多。」，就藉此向大家解釋咩係真正嘅Omakase。蔡瀾解釋，去日本食「鮨」，行入一間未去過嘅舖頭，係唔會話要「Omakase」，因為「對方名氣頗大，也不“MAKASU”，這是動詞。“O”字是敬語，沒有意思。」，入到餐廳，廚師會問客人想要食啲咩，然後會攞出一個擺著各種食材嘅大木盒畀客人選擇，廚師會按照客人喜好，安排之後被客人選擇嘅食材。

暗諷香港嗰啲等於刑罰

蔡瀾認為，「喜歡的一種種自己點來吃，廚師只會介紹產地和稀有的品種，那麽客人就會一樣樣試」，同廚師嘅交流先係叫「MAKASU」，如果唔識講日本嘅客人去食，就要靠日籍廚師嘅助手翻譯，溝通隔了一層，店舖決定嘅任何食材你要吃，吃唔晒唔准打包，因為會壞，損壞聲譽。蔡瀾暗諷香港嘅Omakase店舖：「看著那七八塊捏著大團飯的壽司，用的多是來平衡收入的魚蝦，不想吃也逼你動手，那不叫“鮨”，叫刑罰。」不少網友大讚蔡瀾是「真正的行家，有學識更有氣度」。

蔡瀾：「omakase當所有客人是笨蛋」

蔡瀾每日都會於facebook連載專欄「蔡瀾的日記」，上月其中一篇文章講到日本菜、魚生，蔡瀾就指由廚師發辦的Omakase，係當客人係蠢材的餐廳，認為自己想食啲咩，自己會決定，並唔需要麻煩師傅，更認為Omakase呢種經營方式只不過係商人們的把戲，方便餐廳容易計算成本，而唔係日本菜的精髓！結果言論引來專欄作家周顯喺報紙撰文回擊，指「蔡瀾沒去過幾多間日本最高級的、或最有名料理店，反過來看，我去蔡瀾開設的餐廳，幾乎沒有不中伏的。或者可以說，蔡瀾在30年前也許是權威，但在今天，他的水平連普通food blogger也不如了。」