拍片呃點擊扮小丑嚇途人 隨時嚇到心臟病發搞出人命 深水埗 大角咀出沒！
撰文：odin | 圖片來源：李國權＠Facebook專頁、電影劇照
【扮小丑嚇途人】拍片呃點擊扮小丑嚇途人
區議員李國權直斥事件極之過份，對社區構成嚴重滋擾，呼籲夜歸街坊留意之餘，亦促請相關人士立即停止有關行為，更親自落區尋找線索。區議員李國權指出：「尋晚凌晨12時至1時左右，有女居民向我求助，指有人在大南街楓樹街一帶扮小丑嚇落單女性，並有人從旁協助拍下被嚇者反應。最近治安差左，大南街本月亦出現行劫案件，晚歸人士本身已經擔心，涉事人咁做係極之過份，亦構成對社區嚴重滋擾。今日向地鋪成功索取cctv影像，當事人亦要求我跟進以免出現下一位居民受害，我會嚴肅處理！」
【扮小丑嚇途人】深水埗 大角咀出沒！
區議員李國權指已經向商舖取得CCTV片段，片段中見到兩名年輕男子以小丑打扮，頭戴假髮及口罩，其中一人甚至手持棍狀物品，後面更有一名手持相機男子同行，李國權直斥相關人士嘅行為極之過分，對社區構成嚴重滋擾，加上大南街本月曾經發生劫案，令晚歸人士更加擔心，強調會嚴肅處理。李國權凌晨再發文表示聯同區議員李傲然及曾自鳴喺凌晨12點至1點半「落區行晒大角咀及大南的僻靜小巷」埋伏，可惜未見涉事「小丑」，但有街坊指喺通州街見到佢哋，李國權促請：「請勿再以傷害他人方式拍片、開玩笑，香港人生活已經夠苦，無謂將快樂建築在他人痛苦身上」。
【扮小丑嚇途人】隨時嚇到心臟病發搞出人命
唔少街坊見到篇帖文都怒斥小丑嚇人行為：「唔係話咩嘢點解香港人咁唔玩得，而係真係有病嘅人係唔嚇得，驚恐症發作會抖唔到氣，心臟有事嗰啲又係負荷極大」、「拍片大晒？萬一人哋有病嚇到病發／暈／死咁點？或者有咗唔夠3個月搞到流產咁點？」、「除咗被嚇者有機會受唔住刺激外，就算冇被嚇到發作，都無啦啦幫咗你段片賺view rate，無啦啦免費幫你宣傳」。
