張敬軒「遮遮」帶埋「美食」現身紅館 軒SIR大叫：What？！

撰文：八卦妹、東方新地｜圖片來源：大會提供、東方新地｜（部份原文刊於：東方新地）

張敬軒疫下紅館第一騷

張敬軒相隔一年，成為首位率先重踏紅館舞台的歌手，軒仔身穿黑色雲石皮褸及羽毛帽隆重登場，以經典歌曲〈 酷愛 〉作演唱會序曲，向著紅館觀眾大叫：「 紅館我番嚟喇！大家都番嚟喇！」引得全場拍手叫囂，但見全場有一半座位被收起，他又笑著說： 「 如果比著以前我升上台見到入座率咁樣，一定好唔開心，但依家見到，我好感動，感激大家支持！因為要配合政府防疫規限，所以大家坐得比較疏落，係咪輕鬆好多？哈哈！只要你哋肯嚟，我就肯唱，唱幾多場都冇問題，呢個騷真係得來不易！ 」

今次演唱會共有四個章節，而每一節開頭都會有一首序曲，是軒仔與中樂團一起揀選的。在第二章節中，有四名戴上口罩的 dancers上台伴舞，軒仔笑謂：「原定安排咗超過20位 dancers，不過因為疫情關係減到得番4個，為免人多會喺台上交換飛沫，所以舞蹈員都會戴上口罩。」軒仔又謂要屈就80名樂手一齊坐，並表示自己及需要用口吹奏樂器的樂手事前都有做深喉測試，確定沒受感染才開騷。之後他唱〈悔〉時，表示感受很深：「 2007年當時唱都冇乜感受，有啲歌年少無知時唱，都係置身事外，到人長大咗，再唱先覺得首歌係講緊自己，綵排時我真係邊唱邊哭咗。」然後他又特別多謝老闆楊受成：「畀我空間做音樂，每個演唱會都精益求精，多謝你對我嘅信任。」

張敬軒「遮遮」帶埋「美食」現身紅館

《張敬軒X香港中樂團盛樂》第六場演出，去到第四環節，張敬軒演唱完「桃色冒險」後，就笑話，「比個背脊大家睇下先！都算係我紅館開演唱會以來最少布一件衫啦，我實在就唔係偶像派，多得食姐姐d麵包白粥，食到個背脊瘡都冇粒！」

語畢，張敬軒就繼續表示：「未加場前本身今晚係尾場，我一早預備請左好多好朋友，家人來睇…..」及後，全場觀眾就即時大叫：「遮遮」！張敬軒就即笑說：「我想同大家介紹一個好朋友，佢就係你哋每日係網上見到幫我煮早餐個位姐姐！」而坐於VIP位的「遮遮」，隨即開心起身同台上面的軒仔及觀眾打招呼，令全場觀眾掌聲歡呼聲不斷！

「遮遮」見軒SIR咁開心，觀眾又咁熱烈，突然於座位傍抽起一袋美食，即時同軒SIR示意，已經買了「麵包」，引得全場再次爆笑及掌聲；而張敬軒見到「遮遮」揮著麵包，都忍唔住大笑，反問： 「What？！ No！Breadagain！啲包係…..for breadfast or宵夜？hahahahaha……thankyou anyway for comimg……」觀眾又再次笑到碌地。

軒SIR請「遮遮」的原因

安歌部份，軒仔就突然話，「昨晚我好夜都訓唔著，於是又係上網係到碌，碌碌下發現IGinbox裡面收到一條短訊，跟住我收到一段片，我同佢交流左一段時間之後，我決定係呢度，今晚播出呢條片。」然後大營幕上，就見到一個男歌迷向女朋友大講感人說話求婚。當大家見到女朋友肯首答應時，全場觀眾亦報以熱烈掌聲祝福這一對小情人。

軒仔見男歌迷求婚成功，興奮大叫，「恭喜你呀！」 而該男歌迷就向軒仔示意多謝，開心到熱淚盈框。軒仔此時更細心地於台上拿出一個印著「軒」字的利是封，向一對小情人說，「我係一個好傳統的人，一對新人最緊要利利是是、身體健康、小弟我不知你o地幾時擺酒，唔知我可唔可以出席，所以提前放低人情先！比封老毛你，有我親筆簽名o架！永結同心幸福美滿！完騷後你地去搵工作人員拿啦。」然後更送上「找對的人」，與全場觀眾一同祝福這對新人幸福美滿。

軒仔一眾老友出席撐場

疫情下軒仔舉行演唱會，楊受成夫婦以及軒仔的一眾圈中老友均有到場支持。