PS5行貨香港首度試玩實測！大部到唔會收埋到 L2、R2超進化！新手掣真係勁到嚇親

撰文：海月 ｜圖片來源：海月、SIE

PS5行貨香港首度試玩實測！大部到唔會收埋到 L2、R2超進化！新手掣真係勁到嚇親

Sony新世代遊戲主機PlayStation 5（PS5）將於11月19日正式推出，香港早前開訂隨即售罄，更出現超過$20,000炒價，絕對稱得上「一機難求」。Sony一直都對新主機PS5非常保護，無論主機外形、UI介面、開機畫面等都一直封口，官方鮮有公開實物。今次PS5終於正式於香港現身，即刻睇睇真身係點！

距離正式推出前半個月，Sony終於有首部PS5實機抵港，現場所展示PS5非市面售賣機種（測試用主機），所以亦不允許拍攝局部畫面、拆解機器，僅能使用已安裝的遊戲，就連PS5主畫面亦無法觀覽，試玩僅限於表層體驗。

PS5真係好大部好大部！

Sony公布PS5準版機身尺寸約為390mm × 104mm × 260mm（不包括最大突出部位與底座），機身重量為4.5kg，實機可見相當巨大一部，拍上約42吋電視PS5亦過電視半身。

PS5採用上白色面板包著黑色機身，雖然兩側有明顯散熱風扇設計，不過頂部亦會感受到出少量風熱力。而PS5外側「白色飛翼」設計亦有效減少黑色主機刮花嘅危險。

新手掣Dual Sense震動超進化！

今次PS5使用全新手掣「Dual Sense」，主打「沈浸式回饋體驗」，強調手掣Dual Sense為玩家帶嚟「觸覺回饋」及「自適應扳機」的雙重力量感受回饋。筆者實際接觸試用後，Dual Sense嘅「震動」跟PS4大大唔同，PS4咁除咗「大」、「細」力度外可以話一無事處。而Dual Sense除手掣握把，就連中間操控觸控板、以及成個手掣各部分都會「逐Part」分開作唔同強弱震動回饋，係非常細膩嘅震動感。

另外，Dual Sense嘅震動感再配搭手掣上嘅揚聲器，完美以聽覺補完觸覺手感。當然揚聲器嘅水準，亦比PS4大大提升，唔會再拆聲。當玩家角色喺唔地地面上行走，好似塑膠、鐵板、沙地等都會帶嚟唔同震動感，令玩家親歷其中，將「沈浸式體驗」刻劃得更立體，不過想感受「完整」嘅Dual Sense觸覺回饋體驗，都要留意本身遊戲支唔支援。

Dual Sense手掣上中間嘅觸控版，亦可以跟根據玩家力度作出反應。

另外，PS5 Dual Sense手掣嘅L2、R2，亦係主打嘅「自適應扳機」，平時會好似PS4嘅R2、L2咁「鬆」一按即撳到。不過如果遊戲中支援「自適應扳機」，R2、L2就會出現「抗推力」，甚至出現分段按掣，令玩家喺玩射擊Game、賽車Game時更有手感。而且效果相當明顯，配上R2、L2可局部震動，開槍時極度像真，市面上難以有手掣可同PS5 Dual Sense對抗。

PS5三款遊戲初體驗

伴隨PS5行貨香港一併亮相嘅有《Astro’s Playroom》、《Sackboy: A Big Adventure》以及《Balan Wonderworld》，當中如果大家經已成功訂機PS5，咁《Astro’s Playroom》絕對係體驗PS5新機能嘅必試入門，因為好似Dual Sense 觸覺回饋體驗等，都可以喺《Astro’s Playroom》中完全感受，相反《Balan Wonderworld》則只有極少支援。

《Astro’s Playroom》

一如PS4《The Playroom》，《Astro’s Playroom》就係PS5預載遊戲，非常完整涵蓋Dual Sense所有表現，而且遊戲性亦相當高。

《Sackboy: A Big Adventure》

繼續由Sackboy做主角嘅冒險遊戲，不過今次Sony SIE就交以Sumo Digital操刀，可以雙人遊玩屬一家大細都啱玩嘅動作遊戲。雖然無《Astro’s Playroom》咁「完整」，不過亦相當多地方利用到Dual Sense觸覺回饋，包含六軸操作解謎。

《Balan Wonderworld》

由SQUARE ENIX旗下全新品牌「Balan Company」創作，以《超音鼠》之父中裕司領軍，以及設計Sonic形象嘅大島直人共同開發。不過相當以上兩隻遊戲，遊戲性及Dual Sense支援度明顯有所不足，不過遊戲2021年3月27日才正式推出，廠商仲有時間「執執」。

如果仲諗緊PS5同PS4有幾大分別，糾結嘅買唔買嘅朋友，唔洗理有無120fps、4K、8K等等技術，剩係PS5個Dual Sense手掣觸覺回饋技術，經已有足夠理由入手！