龔嘉欣入行12年終成功上車買樓做業主樣樣親力親為自己搬超貼地｜頭號粉絲

龔嘉欣入行12年，一直都是擔任一些不太起眼的角色，直至4年前，龔嘉欣在劇集《幕後玩家》中，飾演黃宗澤的老婆，並憑出色喊功，贏得無綫萬千星輝頒獎典禮最佳女配角，近年來她開始備受無綫重用，與此同時，儲錢多年的她終成功上車買樓做業主。日前，記者就發現龔嘉欣由廉價村屋搬上樓，而且入手購買的家品更慳得就慳，全部都係至低價入手，還自己將家品抬返新居，十分貼地。

撰文、圖片：東方新地｜編輯：八卦妹（原文刊於：東方新地）

龔嘉欣血汗換千萬安樂窩

父母在深圳經營塑膠用品生意，龔嘉欣無家庭經濟負擔，自16歲開始做模特兒入行，她每次都儲起一半收入，08年簽無綫成為力捧花旦，由配角做到女一，她邊做邊理財，去年踏入30歲斥資7位數字與香港朋友合資在吉隆坡開火鍋店，出入揸百萬保時捷跑車代步，及豪擲935萬元買入將軍澳維景灣畔高層兩房單位，雖被指忽然富貴，但其實龔嘉欣的血汗錢咬開全部有血有汗。

龔嘉欣最近在劇集《殺手》以癲喪女殺手形象示人，Dark Angel剷青紋身、Bra Top熱褲配魚網絲襪，破格又性感。

16年勇奪最佳女配角後，龔嘉欣對自己要求更高，今次憑《殺手》再遇高峰有機衝視后，龔嘉欣贏盡口碑。

平日慳食慳住唔大使終儲夠錢上車

多年來住在將軍澳茅湖仔村屋的龔嘉欣，每月交租約1萬蚊，去年終儲夠首期上車，雖然有首次置業的按揭優惠，但除了一大筆首期，還有物業印花稅、律師費及裝修費近百萬的開支，對這位新手業主來說壓力甚大。最近事業再創高峰，龔嘉欣忙於為《殺手》宣傳之外，亦忙搬新屋。知情者說：「做咗十幾年嘢，Katy賺到儲到從來唔大使，佢成日著贊助衫，平時生活都好慳，唯一喜好係儲錢。咁多年嚟Katy嘅心願都係想買樓，想有一個屬於自己嘅屋企，太貴負擔唔起，終於買到心水單位又要左慳右慳，裝修都係搵朋友介紹相熟師傅，置家具全部格過價先，搬屋亦親力親為。」

龔嘉欣日前現身九龍灣Mega Box的大型連鎖傢俬店，疫情下戴上口罩，一個人逛街顯得有點孤寂。

慳皮搬屋樣樣親力親為

早前龔嘉欣出席完劇集宣傳，離開電視城後到將軍澳寶琳邨幫襯屋邨文具店，掃了多個紅白藍及多卷封箱膠紙，看來是為了搬屋做準備，之後她走到附近的連鎖快餐店買了盒焗豬扒飯便返回村屋。據知龔嘉欣近日已經新居入伙，日前她獨自現身九龍灣的大型連鎖傢俬店，師奶仔上身不停踎低起身揀梳化、餐枱，又狂掃至低價的家居用品，眼前的龔嘉欣全沒半點殺氣，非常賢良淑德，之後她更一手一腳把所有物品抬走，call車返回維景灣畔的新居。

這日為新屋入伙添置小傢俬，龔嘉欣睇過幾張平價小茶几，不過未有扑槌買，應該會四圍格價。

這間連鎖店的傢俬出名大眾平民化，龔嘉欣要為面積不大的新居揀張合適的餐枱，踎低起身試摺枱。

龔嘉欣去到小型家品部，主攻洗手間與廚房用具，十蚊有找的廁所刷與十幾蚊的地墊，都成為她的囊中物。

至於影到她慳皮買家品，龔嘉欣坦言買樓與搬屋耗盡多年血汗錢：「真係唔慳唔得，第一次自己全力供一層樓，真係有壓力，所有嘢都要計過先買，我唔係富婆，我都要付出努力先有成果，好感激好多客戶鍾意我搵我做嘢，雖然受到疫情影響好多工作都要延期，但我相信明天會更好。同埋我鍾意自己事自己做，間屋係自己嘅，我平時成日宅喺屋企，想住得舒服啲，所以你哋會見到我一腳踢。」龔嘉欣唔止睇得同打得，仲入得廚房，裙下之臣一定唔少，不過佢話再搵就係結婚對象，30歲仲有空間可以在事業上搏殺然後先嫁人，拎埋視后做嫁妝咁就最完美。