鄭中基演唱會2024︳宣布延期！原因竟因入境問題 網民：美國單黑歷史

鄭中基入唔到加拿大境演唱會需要延期

鄭中基（Ronald）正在舉行世界巡迴演唱會，仲有2日準備嚟到加拿大站時，Ronald突然喺社交平台宣布需要延期，Ronald亦有交代其原因為因為佢本人的加拿大入境一直處於審查中，就算經過多方努力都係未能如期出發，所以無奈只能同主辦單位決定延期，而日期、退票等安排將會盡快公布。Ronald表示佢真係「好難過、好無奈、甚至生氣」對等候多時的粉絲感到抱歉。

好難過、好無奈、甚至生氣，因為我同團隊、主辦大家都努力咗好耐，而觀眾亦都期待咗好耐，我好想好想可以做得到，真係好對唔住！好希望eTA一批到我就盡快同主辦reschedule過2場show，再同大家見面。

網民猜測會否因為美國洛杉磯醉酒鬧事一事

對於Ronald入唔到境，唔少粉絲都留言支持，表示會等Ronald！「係fans點都會等嘅」「我地無論如何都等你！Good things are worth waiting for!」「等你～」「暴龍哥我地等你」「晴天 陰天 雨天我在何地 亦都會等你」「希望在明天，外國人做嘢係慢啲，總會可以舉行得了」今次加拿大一直唔批Ronald入境，網民就猜測其原因未知是否因為多年前Ronald飲醉酒飛機鬧事有關。當年Ronald喺美國洛杉磯飛去台北時醉酒鬧事，搞到被FBI拘捕、起訴，最終被判罰2,500美元兼留案底。

鄭中基成功入紙紅館24年2月舉行香港站

鄭中基早前宣布好消息，2024年2月將於紅館舉行演唱會的香港站！Ronald原來一直都收到不少信息問「幾時開紅館呀？」自澳門首站啟動後，更加激增，而由去年中秋第一次入紙至今已一年，Ronald 表示收到紅館確認信的一刻都有點難以置信。「 鐵柱終於磨成針！上年中秋開始入紙，每個月入，入到變成每個月嘅指定動作，當收到紅館成功批俾我哋封信嗰一刻，大腦空白一片，心諗：係L唔係㗎？真係得咗啦？我真係暈一暈，然後花咗10幾分鐘冷靜咗個人之後就諗點樣部署。除咗通知各個部門之外，最想嘅就係同大家分享第一手消息，Show date 大概係2024年2月13-18號，但實質日子暫時未定到，定到又再即刻話俾大家聽，我知道講到好亂，但係我真係好開心！再次農曆新年見！」