10年前機舖人山人海，點似而家扮賭場咁冷清
text－隆仔 photo－ptu電影截圖、遊戲截圖
最多人圍觀的一定是《Gundam Seed-d》，2元一局，遊戲平衡，節奏明快，技術要求甚高，為了練出Freedom 5連斬，自動進化為「金幣戰士」，當遇上比自己強的玩家必會有一股爭勝心，「贏唔到你我唔走！」，之後連真人都識「爆seed」，不斷入錢不斷換機，只為挽回一點點面子。不過金幣戰士都總有極限，不是你的銀彈數，而是十多人圍觀的目光，「喂你又輸，到我未呀？跟咗機呀！」
時光飛逝，如今在家中就能輕鬆玩到《Gundam Versus》，但心態已不同，遇上比人虐殺時都只想快點完局，爭取時間打多鋪，無計啦，聽朝仲要返工嘛。
當太多人圍觀自己連敗，其實都真的有點不好意思，惟有敗走到另一個多人的地區-《頭D》。同期其實還有更爽快的《灣岸》、完全走真實系的《Battle Gear4》（細個真心覺得嗰條25蚊嘅車匙好有型，開Game嗰下引擎聲真係聽到流晒口水），但受惠於《頭文字D》電影，大家都好想在場上講一句「86嘅極限已經到咗，輪到我FC發揮喇。」
第一次用「擦紙膠」成功飄移真的十分有成就感，再成功轉5連髮夾彎，直頭覺得可以寫落CV。但及後系列愈出愈離地（同時愈貴），比較像駕駛快艇多過車，兩三年後，《頭D》的極限已經到了，輪到《灣岸》發揮。
不愛玩對戰、賽車Game，還可以選擇音樂Game，那一套鼓機最高難度可能連葉世榮都過不到4個bar。和女生去玩又可以玩拍拍機，模仿遊戲講「解說」又哄到佳人一笑，扮不小心打到她的玉手，引她反擊，你又打下佢，佢又打下你，打下打下咪拖拖手做個好朋友囉。毒L一個人也可以去玩槍Game，《House of the Dead》射喪屍、《Time Crisis 4》射蟲，要不然《The Typing of the Dead》打字殺喪屍……每一部遊戲都獨當一面，各有千秋。
說到這裏，大家是不是想落樓下機舖懷念一下呢？但當你發覺比較小型的機舖都只充斥着一部部老虎機、推銀機，兩三個上了年紀的人在消磨時間，就會發現其實時代已經變了，還是回家玩連敗幾十回合都沒感覺，單機不能雙打的《Gundam Versus》吧。
內容延讀：
《電車Go！》20周年出「即插即玩」遊戲機
>>>LIKE我們fb <<<
