《Chiikawa》突然宣布暫停播放！粉絲哀號：冇咗精神寄託

日本動畫《Chiikawa》（ちいかわ）近年人氣爆燈，角色好似Usagi、小八等都深受觀眾喜愛。不過，製作組今日就突然宣布，由今年4月開始會暫停常規播放新集數，改為重播精選舊內容，預計到7月先會恢復正常播出。咁做係為咗畀製作組有更多時間創作新系列內容，仲預告未來會加入新角色！

喺「停播」嘅3個月期間，富士電視台會改為播放粉絲反應熱烈嘅經典《Chiikawa》集數。另外，官方仲宣布會升級每週一到週五嘅「吉伊卡哇占卜單元」，原本單元結束後嘅10種差分小動畫會追加5種新內容，俾更多驚喜粉絲！

《Chiikawa》自2020年由日本插畫家ナガノ（NAGANO）喺社交平台X（原Twitter）連載，並喺2022年4月改編成電視動畫後，迅速累積大量粉絲。故事圍繞膽小愛喊但溫柔嘅吉伊卡哇同好朋友小八貓、兔兔等嘅日常生活，表面睇落輕鬆可愛，但背後其實隱含住好似《鋼之鍊金術師》、《進擊的巨人》、《約定的夢幻島》等作品嘅深刻設定，例如等價交換、階級管理同埋暗喻嘅社會現象。呢種同可愛角色形象形成強烈反差嘅敘事風格，成為《Chiikawa》獨特嘅魅力所在。

停播新集數嘅消息一出，即刻引起網民熱烈討論。好多網民都話「3個月都冇新動畫睇喇」、「即刻冇咗精神糧食」，仲有粉絲搞笑咁講「比起我偶像去當兵仲晴天霹靂」。雖然係咁，都有好多粉絲對未來嘅新篇章表示期待，認為製作組需要時間去打磨更好嘅內容。

製作組解釋，今次停播係為咗籌備新系列嘅製作，同埋確保動畫質素可以滿足粉絲嘅期待。雖然具體恢復播放嘅時間可能會有所調整，但官方承諾會喺7月恢復常規播放，並帶嚟更多精彩內容！