168「宅男」有咩魅力、成功虜得新垣結衣BB心？原來星野源「情史」多籮籮！

撰文：馬高斯 ｜圖片來源：Amazon.co.jp、TBS公式 YouTuboo、東洋經濟、星野源YouTube頻道、joseiana.com、hominis、星野源Twitter｜編輯：海月

星野源「情史」多籮籮！

女神新垣結衣與星野源嘅婚訊一出，消息轟動全球，一如既往更「影響」到日本股市大跌，兩人嘅緣份係由5年前共演嘅人氣日劇《逃跑雖可恥但有用》，劇中飾演一對甜蜜夫婦，當時已經傳出過戲假情真，點知上年嘅《逃恥》特別篇拍攝果陣，就擦出咗愛火！

呢位現年40歲嘅星野源，單睇外型絕對唔係男神級，身高亦只得168cm。喺《逃恥》入面仲扮演一位四眼草食男宅宅，不過現實中星野源其實絕不簡單！佢除咗係演員之外，亦係一位知名嘅創作歌手，唔少人氣日劇，例如《過度保護的加穗子》、《逃恥》，仲有今季嘅《打扮的戀愛是有理由的》，主題曲都係出自星野源。另外，仲喺日本武道館、東京巨蛋等地方舉行過演唱會，音樂才華出眾！

才華出眾自然迷倒唔少女士，星野源嘅異性緣好到一個點，就等我細數一下佢嘅豐富情史！星野源10年前仲未走紅，已經與同為創作歌手嘅樂壇天后aiko發展出姊弟戀，後來2013年星野源與共拍電影《深宅家中兒子的戀愛》女主角夏帆傳出緋聞，仲喺記者會上講出「我今日要同夏帆結婚，佢係我老婆！」，令到唔少人猜測同aiko嘅戀情已經告終。

然後同年再與電影《Why Don’t You Play in Hell?》，共演嘅二階堂富美傳出緋聞，不過兩人都異口同聲澄清關係，話只係好好嘅朋友。後來傳出過戀情嘅對象都好高質，例如知名女星石橋杏奈，同埋人氣女主播有働由美子，外界仲為星野源封上「偽宅男」嘅稱號，認真係「偽毒可恥」（誤）。

點知果頭「偽毒可恥」，呢頭2016年就伙拍結衣BB拍攝《逃恥》，成為劇情甜到核爆嘅螢幕情侶。當時嘅訪談中，星野源被問到「有無對結衣BB動心？」，佢仲答「鍾意！從一開始就鍾意。」，原來伏線早就埋藏咗！

有粉絲再睇返星野源於2017年出版嘅書《從生命的車窗眺望》入面，其中一篇文章係「新垣結衣這個人」，文中形容結衣BB係一位「很棒的普通女孩」，又大讚結衣BB人氣咁高，都毫無架子，喺演藝界可謂難能可貴。唔聲唔聲，原來喺書中文字間已經暗藏愛意！

除咗訪談同出書之外，仲被粉絲考古發掘返10年前於Twitter嘅post，當時星野源講過心目中嘅理想對象係新垣結衣，睇嚟呢位才子喺10年前已經迷戀緊結衣BB！

既然兩人宣布咗結婚，將劇中內容轉變成現實，168宅男成功捉住國民女神嘅心，化不可能為可能，都係一件滿滿正能量嘅事，小編都衷心恭喜佢哋！（無咩事我去告假一日先）