【西貢黑的】露營客群起拒搭「劏客」的士！「黑的」死死地氣跪低 最後竟然……

撰文：Odin ｜圖片來源：興華茶餐廳 ｜編輯：海月

【西貢黑的】露營客群起拒搭「劏客」的士！「黑的」死死地氣跪低 最後竟然……

大時大節唔少地方都例牌出現唔少劏客「泥鯭的(意思係指唔跟咪錶收費)」，再逐位計夾雜唔同嘅陌生客同車一齊，近日Facebook就有人整咗份千字文記低佢嘅經歷，指元旦過後一班露營客從西貢萬宜水庫東壩回程搭的士遇到「泥鯭的」劏客，露營客居然團結起嚟杯葛呢架「泥鯭黑的」，「黑的」死死地氣跪低依然冇人幫襯最終空車離開。

元旦當日唔少地方都有人等睇日出，網民指回程嗰陣諗住搭的士離開，點知條的士龍有成接近五十人排緊，排隊期間重聽到有個司機將車程約$120左右嗌到成「$100一位返西貢市中心」，天寒地凍唔少人都趕住想快啲返屋企沖返個熱水涼，呢位「黑的」司機見到咁多人實劏你啦，正當大家以為苦主即將出現嘅時候，神奇嘅事情居然發生！

網民表示聽到「黑的」嗌緊成舊水一位乘客，但遲遲都見唔到有人上車，個「黑的」司機嗌咗段時間見冇生意就死死地氣跪低，改口話「跟錶正價都得喇，快啲上車啦」，但團結嘅乘客們已經無視佢，甚至有班人大嗌「走啦，冇人想搭你車呀」，最終佢唯有吉車離開，偷雞唔到蝕渣米。

網民追完po跟住回應話嗰度不嬲都有好多「黑的」劏客，但一直都冇客敢出聲，大讚香港人進步咗。重話細細個都曾經試過「出頭」大嗌「咁貴，一齊唔好搭」點知畀其他乘客「怒啤」返轉頭，最後重有個俠義的士司機出現話曾免費載兩個後生仔客出閘口，並鼓勵香港人要爭氣。